Amandyq Batalov ardagerlerge qurmet kórsetti
Búgin oblys ákimi Amandyq Batalov Uly Jeńis merekesi qarsańynda oblystyń 200 ardagerin saltanatty túrde qabyldady. 64 Uly Otan soǵysy ardageri men 136 tyl eńbekkerine kontserttik baǵdarlama men baǵaly syilyqtar usynyldy. Qart qonaqtardy bolashaq Otan qorǵaýshylar – Ile aýdanyndaǵy kadet synybynyń oqýshylary qarsy aldy, – dep habarlaidy Almaty oblysy ákiminiń baspasóz qyzmeti.
Basqosýda quttyqtaý sóz sóilegen oblys ákimi Amandyq Batalov:
– Sizderdiń jastyq shaqtaryńyz Uly Otan soǵysy kezeńimen qatar keldi, soǵystan keiin de búlingen sharýashylyqty qalpyna keltirip, eldiń eńsesin qaita kóterdińizder. Sizder qiyndyq pen aýyrtpalyqtyń bárin abyroimen jeńe bildińizder. Sol úshin de oblysymyzdyń barlyq ardagerlerine shyn júrekten alǵysymdy bildiremin. Búgingidei Jeńis meiramy qarsańynda Sizderge myqty densaýlyq, uzaq ǵumyr tileimin, - dedi.Saltanatty basqosýda ardagerler de tilekterin bildirip, jinalǵandardy merekemen quttyqtady. Olardyń qatarynda Eńbekshiqazaq aýdanynyń turǵyny UOS ardageri Soltanbai Jaryqbasov, tyl eńbekkeri, taldyqorǵandyq Aleksandr Mosko da bar.
Memleket basshysynyń jan-jaqty qoldaýyn sezinip otyrǵandaryn aita kele ardagerler osyndai syi-qurmettiń arqasynda ýaqyt tezine, syrqatqa moiymai, boilaryn tik ustap kele jatqandaryn jetkizdi. Jurtshylyqty Uly Jeńis merekesimen jáne Otan qorǵaýshylar kúnimen quttyqtap, ashyq aspan, beibit ómir, elimizdiń ósip-órkendeýine tilektestikterin bildirdi.
Jalpy, Almaty oblysynda 190 Uly Otan soǵysynyń ardageri, 13 myńǵa jýyq tyl ardageri bar. Jyl saiyn Jeńis kúnine orai UOS qatysýshylary men múgedekterine oblystyq biýdjetten bir rettik materialdyq kómek úshin qarjy bólinedi. Soǵan sáikes biylǵy jyly ár ardagerge 150 myń teńgeden beriletin bolady. Sonymen qatar tegin sanatorlyq emdelýge, kommýnaldyq tólemder men qajetti quraldarmen qamtamasyz etýge qarjy qarastyrylǵan.
