Oblys ákimi A. Batalov quttyqtaýyn 96 jastaǵy Ábish Oshaqbaiulynyń shańyraǵynan bastady. Ardager maidandaǵy erligi úshin Qyzyl Juldyz, I dárejeli Otan soǵysy, Qurmet belgisi ordenderimen, «Germaniiany jeńgeni úshin», «Stalingradty azat etkeni úshin», «Maidandaǵy erligi úshin» medaldarymen marapattalǵan. Qariiamen áńgimelesken Amandyq Batalov aqsaqalǵa uzaq ǵumyr, myqty densaýlyq tiledi. Ardagerge arnap qala mektepteriniń oqýshylary Otan, erlik jaily óleńder oqydy.
Maidandaǵy jyldardy esine alǵan Altynai apa jeńiske jetkizgen Otanǵa degen sheksiz súiispenshilik pen birlik ekenin atap ótti. Bul qundylyqtar áli de óz baǵasyn joiǵan joq. Ózin quttyqtaýǵa kelgen oqýshylarǵa qarata da ardager óz tilegin jetkizdi:
– Eń bastysy – jaqsy oqyńdar, tárbieli bolyńdar, ata-analaryńnyń qýanyshy, Otannyń tiregi bolyńdar. Bilim – barlyq igiliktiń kilti. Qolda bar nárseni qadirlei bilý kerek, bar múmkindikti paidalana bilý kerek. Balalardyń biz kórgen qiyndyqty kórmei, bolashaqtary jarqyn bolýyn tileimin! – dedi Altynai apa.
Sózin jalǵastyrǵan ardager:
– Osy kúnge jetkenime shúkirshilik etemin. Qazir halyq beibitshilik pen tynyshtyqta jaqsy ómir súrip jatyr, kiimi kók, qarny toq. Sondyqtan Elbasymyzǵa rizamyn. Barlyǵyńa zor densaýlyq tileimin, – dedi.
Budan ári quttyqtaý Sársenbai Qańtarbai aqsaqaldyń úiinde jalǵasty. Maidan dalasyndaǵy erligi eskerilip, Sársenbai qariiaǵa I jáne II dárejeli Ula Otan soǵysy ordenderi, «Erligi úshin» medali jáne basqa da nagradalar berilgen. Sonymen qatar ardager beibit ómirdegi eseli eńbegi úshin de birqatar marapattarǵa ie bolǵan.
– Sizdi Jeńis kúnimen quttyqtap, ózińizge, jaqyndaryńyzǵa myqty densaýlyq, uzaq ǵumyr tileimin. Biz árqashan ardagerlerge qamqorlyq kórsetip, qoldap otyramyz. Bul – Prezidentimizdiń memlekettik saiasatyndaǵy basym baǵyttarynyń biri, - dedi A. Batalov.
Óz kezeginde Sársenbai aqsaqal da rizashylyǵyn jetkizip, barshaǵa beibit te berekeli ómir tiledi.
Almaty oblysy ákiminiń baspasóz qyzmeti
