Partiia Tóraǵasy Isatai aýdanynda belgili quqyq qorǵaýshy Abzal Quspanmen birge jergilikti turǵyndarmen kezdesip, azamattardy qabyldady.
Erlan Qoshanov óz sózinde Memleket basshysy Ádiletti Qazaqstandy qurý jolynda adam quqyqtary máselesine basa mán berip otyrǵanyn atap ótti. Máselen, Konstitýtsiialyq Sot qurylyp, Bas prokýratýra men Adam quqyqtary jónindegi ýákil konstitýtsiialyq mártebege ie boldy. Halyq arasynda quqyqtyq máseleler óte ózekti. Soǵan bailanysty, óńirde turǵyndardyń quqyǵyn qorǵaityn «Quqyqtyq kómek» jańa partiialyq jobasy pilottyq rejimde iske qosyldy.
«Jasyratyny joq, bizdiń qoǵamda azamattardyń quqyqtyq, qarjylyq saýattylyǵy áli de tómen. Sonyń saldarynan, olar sotta nemese basqa da memlekettik organdarda óz múddelerin qorǵai almai jatady. Shalǵaidaǵy aýyl turǵyndarynyń bári birdei mundai kásibi kómekke qol jetkize almai otyrǵandyqtan, jańa partiialyq joba aiasynda zańgerler aýyl-aýyldy aralap, halyqqa arnaiy quqyqtyq kómek kórsetedi. Ádildik pen zańnyń ústemdik qurýy osyndai naqty isterden bastalady», – dedi partiia Tóraǵasy.
«Quqyqtyq kómek» partiialyq jobasy sheńberinde zańgerler jergilikti jerde azamattarǵa zańgerlik kómek kórsetý úshin oblystaǵy aýdan ortalyqtaryna barady. Iaǵni, sotta, qylmysty qýdalaý organdarynda jáne taǵy basqa jaǵdaida azamattarǵa ókilettik etýge, aryz-talap toltyrýǵa, ózin qorǵaýǵa kómek kórsetiledi. Turǵyndarǵa qarjy jáne quqyqtyq máseleler boiynsha túrli keńes beriledi.
Osy kúni Erlan Qoshanov «Aqtóbe-Atyraý-Astrahan» baǵytynda salynyp jatqan respýblikalyq mańyzy bar jol ýchaskesine bardy. Merdiger uiymnyń ókilderi oǵan qurylys jumysynyń barysy týraly baiandady. Joba jyl sońyna deiin aiaqtalady dep josparlanyp otyr.
Sondai-aq, Erlan Qoshanov «AMANAT»-tyń oblystyq aktivimen kezdesip, partiialyq jobalardyń iske asyrylý barysyn jáne aldaǵy Májilis pen máslihattar depýtattarynyń sailaýyna daiyndyq máselesin talqylady. Búginde oblysta 106 bastaýysh partiia uiymy biriktirip otyrǵan 23 myńnan astam amanattyqtar bar.
