Eks-prezidenttiń úshinshi qyzy Áliia Nazarbaevanyń reiderlik áreketterinen zardap shekkenin málimdegen kásipkerler "Eski Qazaqstannyń qurbandary" atty qozǵalys aiasynda birikken. Endi olar shetelden zańgerlik qoldaý izdep otyr. Sebebi eldegi ádildikke kúmánmen qaraidy, - dep habarlaidy Dalanews.kz.
Orda.kz derekterine súiensek, 16 mamyrda Almatyda ótken baspasóz máslihatynda "Eski Qazaqstannyń qurbandary" qozǵalysynyń ókilderi óz múddesin qorǵaý úshin halyqaralyq instantsiiaǵa júginýge ýáde etken. Tuńǵysh prezidenttiń qyzyn "kásibimdi reiderlik jolmen basyp aldy" dep aiyptaǵandardyń biri - kásipker Nurlan Bimýrzin, ol - "Aziia" TRK-niń burynǵy ieleriniń biri.
"Aqpanda Bas prokýratýraǵa ótinish berdik. Ol isti politsiiaǵa jiberdi. Ol óz kezeginde materialdardy Almaly aýdanyna tapsyrdy, alaida Almaly aýdanyna eshqandai qatysymyz joq. Bizge qylmystyq is qozǵaýdan bas tartty, keiin materialdardy Almaty qalasynyń ekonomikalyq tergeý departamentine tapsyrdy. Onda bizge "bizdiń ne qatysymyz bar?" dedi. Biz tergeý sotyna shaǵym túsirdik, ol da isten bas tartty; sodan keiin qalalyq sotqa shaǵymdandyq, olar da solai jasady. Óz elimizde, óz úiimizde qorǵan taba almai, ádildikke qol jetkize almai júrmiz", - dedi Nurlan Bimýrzin.
Basylym málimetinshe, Nazarbaevany jaýapqa tartý áreketteri shynymen saiabyrsyp qalǵanǵa uqsaidy. Óitkeni basylymǵa bergen jaýabynda Almaty prokýrorynyń orynbasary Ashat Sháripov Nurlan Bimýrzin men Medǵat Qalievtiń Áliia Nazarbaeva men Valentina Rogovaǵa qarsy málimdemesi nomenklatýralyq óndiriske shyǵarylǵanyn aitqan. Oǵan qosa prokýratýrada qylmystyń quramyn kórsetetin "jetkilikti derekter bolmaǵany" aitylǵan.
"Nurlan Bimýrzinniń aitýynsha, mundai jaǵdaida "Eski Qazaqstannyń qurbandary" halyqaralyq deńgeige shyǵýǵa májbúr. "Aziia" TRK-niń burynǵy ieleri óz múddesin qorǵaý jáne reiderlik basyp alý deregin dáleldeý úshin ultaralyq zań kompaniialarymen yntymaqtasýǵa nietti", - dep jazylǵan málimette.
Basylym derekterine súiensek, qoǵam belsendisi Jarqyn Kúrentaev "Aziia" TRK-ni basyp alý týraly is boiynsha jańa qujattar alǵan. Onyń aitýynsha, bul qujat Valentina Rogovanyń biznesti iemdený shemasyna qatysyn rastai alady.
"Naýryzdyń basynda BAQ Valentina Rogovanyń Nazarbaeva hanymǵa tek zańgerlik qyzmet kórsetkeni týraly málimdemesin taratty. Biraq onyń 95 paiyzy Áliia Nazarbaevaǵa tiesili "Arlan" holdingtik kompaniiasynyń direktory qyzmetin atqarǵanyn kýálandyratyn qujat bar", - dedi ol.
Belsendi qazaqstandyq quqyq qorǵaý organdarynyń kómegi bolmaǵan jaǵdaida ózderin "Eski Qazaqstannyń qurbany" dep sanaityn kásipkerler sheteldik instantsiialarǵa júginýge jáne AQSh, Ulybritaniia, Frantsiia jáne Shveitsariiadan aqparat suraýǵa májbúr ekenin aitty.
"Áliia Nazarbaevanyń múlki dál sol jerde degen kúdik bar. Biz halyqaralyq zań kompaniialarymen kelisimge qol qoiamyz jáne onyń múlkin shetelden izdeýmen, tárkileýmen ainalysamyz", - dedi ol.
Aita keteiik, biyl 28 aqpanda "TPK Asia" JShS quryltaishysy Nurlan Bimýrzin seriktesi Megdat Qaliev ekeýi Nazarbaeva men Rogovanyń reiderlik shabýylynyń qurbany bolǵanyn málimdegen bolatyn.
Bimýrzinniń aitýynsha, 2003 jyly Áliia Nazarbaeva óz yqpalyn paidalana otyryp, quny 170 million dollar bolatyn (2003 jylǵy esep boiynsha - esk.) jeti munai bazasy men 96 janarmai quiý beketin tartyp alǵan.
"Basynda qarjy politsiiasy qysym kórsetti. Sosyn Áliia Nazarbaevanyń ókili kelip, bizge qorǵan bolýǵa shamalary jetetinin jetkizdi. Ol úshin biznestiń 50 paiyzy berilýi keregin aitty. Bir jyldan keiin Áliia Nazarbaeva endi qalǵan úlesti de berý keregin eskertti. Sol jyly meniń ákemdi olar alyp ketip, Nazarbaevanyń keńsesine aparǵan. Ákemmen sóilesken. Eki ulyń úshin alańdasań, biznesińdi ber degen. Amal joq, ákem kelisedi.
Kelesi kúni men bardym. Ol jerde Áliia bolǵan joq, biraq onyń ornyna Rogova boldy. Men sol jerde úlesimdi bar joǵy 18 125 teńgege satýǵa májbúr boldym", - deidi Nurlan Bimýrzin.
14 naýryzda Bas prokýratýra Nazarbaevanyń reiderlik áreketi týraly aryzyn tirkegenin habarlady. Alaida 5 sáýirde politsiia eks-prezidenttiń kenje qyzyna qatysty qylmystyq is qozǵaýdan bas tartqany belgili boldy.
