Bıylǵy 1-qańtardaǵy málimet boıynsha áleýmettik-eńbek salasynda barlyǵy 12,6 mln memlekettik qyzmet kórsetilip, onyń 9,1 mln nemese 72%-y elektrondyq túrde kórsetilgen.
Úkimet basshysy atap ótkendeı, sıfrlandyrý memlekettik servıstiń barlyq túrin qamtýy tıis, bul úshin memlekettik organdardyń aqparattyq júıelerin túgel ıntegrasıalaý qajet.
Sonymen qatar memlekettik qyzmetter 100% smartfon arqyly qoljetimdi bolýy shart. Birinshi kezekte halyq eń kóp júginetin áleýmettik eńbek salalaryna sıfrlyq transformasıa qajet.
– Jumyspen qamtý salasyndaǵy memlekettik qyzmetterdiń qoljetimdiligi men ashyqtyǵyn qamtamasyz etý úshin biryńǵaı aqparattyq júıe qurýdy aıaqtaý qajet, – dedi Álıhan Smaıylov.
Úkimet basshysy sıfrlyq formattyń múgedektigi bar adamdar úshin óte mańyzdy ekenin atap ótti. Sondyqtan, olarǵa arnalǵan barlyq qyzmetti, ásirese, múgedektikti medısınalyq-áleýmettik saraptama arqyly syrttaı belgileý qyzmetin sıfrlandyrý kerek.
Áleýmettik-eńbek salasyn sıfrlandyrýdy kúsheıtý úshin Premer-Mınıstr Álıhan Smaıylov Eńbek jáne halyqty áleýmettik qorǵaý mınıstrligine ákimdiktermen jáne «Atameken» palatasymen birlesip, jyl sońyna deıin jumyspen qamtýǵa járdemdesýdiń barlyq sharalaryn elektrondyq formatqa aýystyrýdy qamtamasyz etýdi jáne jumys izdep júgingen azamattardyń keminde 40%-yna onlaın rejımde qyzmet kórsetýdi tapsyrdy.
Sıfrlyq damý mınıstrligine Eńbek mınıstrligimen birlesip, bıylǵy jylǵy 25-naýryzǵa deıin Smart Data Ukimet bazasynda «Otbasynyń sıfrlyq kartasy» jobasyn iske asyrý jumystaryn aıaqtaý júkteldi.
Budan basqa, Eńbek jáne halyqty áleýmettik qorǵaý mınıstrligine Densaýlyq saqtaý mınıstrligimen jáne ákimdikterimen birlesip, aldaǵy jyldyń 1-maýsymǵa deıin medısınalyq aqparattyq júıelerdi «múgedektikti syrttaı belgileý» jobasyna qosý jáne memlekettik qyzmettiń osy túrin syrttaı alatyn adamdardyń úlesin 20%-ǵa deıin jetkizý tapsyryldy.
