Búgin el talai jyl taryǵyp ta, zaryǵyp ta kútken tarihi oqiǵa boldy! «Aq jol» partiiasynda aq túieniń qarny jaryldy! Alash kósemi Álihan Bókeihannyń 150 jyldyǵyna arnalǵan saltanatty shara – Qazaqstan Respýblikasynyń Ulttyq Banki shyǵarǵan mereitoilyq estelik monetanyń tanystyrylym rásimi ótti.
2012 jyly 7 qazanda Alash ataýy Qazaqstan parlamentinde alǵash ret estildi. «Aq jol» demokratiialyq partiiasy Alashtyń 95 jyldyǵyn atap ótý jóninde úkimet basshysyna depýtattyq saýal joldady. Osynda alǵash ret Alash kósemderi Álihan Bókeihan, Ahmet Baitursynuly, Mirjaqyp Dýlatov jáne t.b. alashtyq arystardyń aty ataldy!
«Aq jol» partiiasy 2015 jyldyń qarashasynda Álihan Bókeihannyń 150-jyldyǵy qurmetine arnalǵan is-sharalaryn jalpyulttyq deńgeide uiymdastyrý jóninde QR úkimetine depýtattyq saýal joldaǵanyn jáne ony qoldaǵan jaýap alynǵany týraly eske sala keteiik. Sodan keiin kóp keshikpei IýNESKO-nyń Bas assambleiasy Álihan Bókeihannyń mereitoilyq is-sharalaryna halyqaralyq mártebe berý jáne ony IýNESKO sheńberinde ótkizý týraly qarar qabyldaǵany belgili. Bul jolda «Aq jolmen» birge tize qosyp eńbek etken Sultanhan Aqquly bastaǵan alashtanýshy ǵalymdarǵa da alǵys aitamyz.
Jiyndy júrgizip otyrǵan «Aq jol» demokratiialyq partiiasy tóraǵasy Azat Perýashev:
«Byltyr IýNESKO halyqaralyq uiymynyń sheshimimen qazaq eliniń kórnekti qairatkeri Álihan Bókeihannyń 150 jyldyq mereitoiyn halyqaralyq deńgeide atap ótýge sheshim qabyldandy. «Aq jol» partiiasy osy baǵytta qoǵamdyq-mádeni birqatar sharalardy atqaryp keledi. Alash murasy qazaq elin biriktiretin kúsh. Qairatkerdiń 150 jyldyǵyna arnalǵan monetanyń tusaýkeresine kýá bolyp otyrmyz. Bul úlken qýanysh»-dep atap ótti.
Osylaisha Álihan Bókeihan esimi álemdik tarihqa endi. «Aq joldyń» bastamasymen merekelik poshtalyq marka biylǵy 12 shildede jaryqqa shyqty. Endi mine, Ulttyq Banki shyǵarǵan mereitoilyq estelik moneta qolymyzǵa tiip otyr!
Ulttyq Bankke rahmet aita otyryp, bir áttegenaiy da aitylmai qalmady. Ol Alash kóseminiń aty men tegi Ulttyq banktyń resmi tanystyrylymynda eki tilde eki túrli bolyp júrgeni. Qazaqshasynda “Álihan Bókeihan” da, orysshasynda “Alihan Bokeihanov” bolyp ketken. Álihannyń teginde “ov” jalǵaýy bolmaǵanyn Azat Perýashev ta, Sultanhan Aqquly da oryndy eskertip ketti. Adamnyń eki túrli aty- tegi bolmaitynyn ulttyq tólteńgeni de eki eldiń tilinde jazatyn Ulttyq bank qaidan bilsin…
«Aq jol» estelik monetany qymbat baǵaly metaldan, altyn ne kúmisten jasalýyn suraǵan bolatyn. Biraq qarapaiym metaldan 100 myń danamen shyqqan estelik moneta eki-úsh kúnde lezde taralyp ketipti… Osydan-aq, Álihanǵa degen eldiń zor yqylasyn baiqaýǵa bolady. Iaǵni, osy qarapaiym monetanyń qalyń qazaq úshin baǵasy joq! Alash úshin altynnan da qymbat!
Endeshe, Alash balasy qýanyp jatqan aitýly oqiǵa qutty bolsyn, Qazaq eli!
Qazybek ISA,
Qazaquni.kz
