Elordadaǵy Roza Baǵlanova atyndaǵy «Qazaqkontsert» zalynda sýyryp salma aqyndardyń 11 juby eki kún boiy aityssúier qaýymdy óreli óneri, órnekti sózderimen sýsyndatty. Olar Táýelsiz Qazaqstannyń 30 jyldaǵy jetken jetistikterin, Elbasy saiasatynyń arqasynda berekesi artyp, birligi jarasqan eldegi aýyzbirshilik pen saiasi turaqtylyqty, Táýelsizdik jolynda jan aiamai kúresken tulǵalar týraly jyrlady. Arasynda ádemi ázil men jarasymdy qaljyń da aityldy.
Aqyndardyń ónerine kórnekti óner qairatkeri, Qazaqstan jáne KSRO Halyq artisi, Memlekettik syilyqtyń iegeri Asanáli Áshimov bastaǵan qazylar alqasy baǵa berdi. Sondai-aq, qazylar quramynda aitys aqyny, Qazaqstannyń halyq aqyny Ásiia Berkenova, úsh dúrkin «Altyn dombyra» iegeri Muhtar Niiazov, aitysker aqyn, Qazaqstannyń eńbek sińirgen qairatkeri Amanjol Áltaev jáne ózge de óner, qoǵam qairatkerleri boldy. Alamandy Qazaqstannyń eńbek sińirgen qairatkeri, Halyqaralyq aitys jáne jyrshy-termeshiler odaǵynyń tóraǵasy Júrsin Erman júrgizdi.
Aitystyń shyraqshysy atanǵan Júrsin Erman ata-babalarymyzdan miras bolyp jetken tól ónerimizge qoldaý bildirip kele jatqan «Nur Otan» partiiasyna alǵysyn jetkizdi.
– Qazaqtyń bekzat óneri aitysty «Nur Otan» partiiasy qanatynyń astyna alǵaly 3 jyldan asty. Erkindikti, keńdikti, qýatty qoldaýdy sezinip jatyrmyz. Sondyqtan, osy aitysqa qoldaý bildirip otyrǵan elimizdiń bas partiiasyna aqyndardyń atynan shynaiy alǵysymyzdy bildiremiz, – dedi Júrsin Erman.
Sonymen, qazylar alqasynyń sheshimimen merekelik aitysta aqyndardyń eshqaiysy da júldesiz qalmady. Yntalandyrý syilyǵyna Arǵynbek Qalbaev, Tólegen Jamanov, Baýyrjan Shirmedin, Nurzat Qarý, Raýan Qaidarov, Qalijan Birdásh ie boldy. Qazylar alqasynyń tóraǵasy Asanáli Áshimovtiń usynysymen taǵaiyndalǵan arnaiy júlde Bóken Jigerge berildi. Úshinshi orynǵa eki aqyn laiyq dep tanylsa, ony Rústem Qaiyrtai men Jansaia Mýsina enshiledi. Ekinshi orynǵa Meiirbek Sultanhan ie boldy. Birinshi oryn men «Aitystyń aqtańgeri» tósbelgisi Erkebulan Qainazarovqa berildi. Al bas júlde – «Altyn dombyra» jáne Nur-Sultan qalasynyń ákimdigi taǵaiyndaǵan temir tulpar jyr alamanynda shashasyna shań juqtyrmaǵan Bekarys Shoibekovke buiyrdy.
Dúbirli dodanyń bas júldesin tapsyrǵan «Nur Otan» partiiasy Tóraǵasynyń Birinshi orynbasary Baýyrjan Baibek ulttyq ónerimizdi ulyqtaýǵa atsalysyp júrgen azamattarǵa jáne jyr báigesiniń alamanyna qatysqan barsha aqyndarǵa rizashylyǵyn bildirip, shyǵarmashylyq tabys tiledi.
– Aityskerlerimiz eki kún boiy óte jaqsy óner kórsetti. Qanshama tushymdy oi, qanatty sóz aityldy. Táýelsizdik jyldaryndaǵy jetistikterimizdi jan-jaqty kórsetip, jyrǵa qosty. Biz shyn máninde Máńgilik el bolamyz desek, onda aitysty qoldaýymyz kerek. Nege deseńiz, ol – aldymen ana tilimizdi qoldaý. Sodan soń, óner jarystyryp, sóz saiystyrý bolǵan kezde aqyndardyń sheberligi shyńdalady. Qazirgidei pandemiia jaǵdaiynda kontsertter burynǵydai kóp óte bermeitindikten, shyǵarmashylyq adamdarynyń tabysyna áser etýde. Osynyń bárin eskerip, onyń ústine jas urpaq ulttyq ónerimizdi umytpasyn jáne ana tilimizdiń abyroiy asqaqtasyn ári halyq aitys kórip, aiyzy qansyn degen maqsat boldy, – dedi partiia Tóraǵasynyń Birinshi orynbasary.
Sondai-aq, ol kil myqtylar jinalǵan alamanda naǵyz júirikti anyqtaý qazylar alqasyna ońai bolmaǵanyn aita kele, inilik izetpen aǵasyna jol bergen túrkistandyq aqyn Erkebulan Qainazarovqa rizashylyǵyn bildirdi.
– Sońǵy jyldary Elbasynyń tapsyrmasy boiynsha Túrkistan shyn máninde Túrki áleminiń rýhani ortalyǵy retinde damyp kele jatqanyn bilesizder. Qanshama qurylys júrgizilgen kieli shahar búginde qaita túlep jatyr. Osy joly «Altyn dombyranyń» iesi – Bekarys Shoibekov. Endi «Altyn dombyra» da Túrkistanǵa ketedi. Túrkistan jurtyn quttyqtaimyz! Bastysy, elimiz aman, jurtymyz tynysh bolsyn! Táýelsizdigimiz tuǵyrly, eldigimiz máńgilik bolsyn! – dedi Baýyrjan Baibek.
Óz kezeginde, bas júldeni qanjyǵasyna bailaǵan Bekarys Shoibekov lebizin óleńmen jetkizdi:
Atyńnan ainalaiyn Alty Alashym
Saǵan kelip, keńidi-aý arqa-basym.
Azattyq alǵan kúni bastalǵan toi,
Qazaq aman bolǵanda tarqamasyn!
Biz endi Túrkistanǵa bet alamyz,
Buiyrsa birer kúnde jete alarmyz.
Ol bizdiń tórt qaqpaly qalamyz ǵoi,
Tanytpai ony qalai jata alamyz?!
Ashyp qoi tórt qaqpańnyń tórteýinde,
Aramyzda joq bizdiń shekaramyz.
Erkebulan ekeýmiz qatarlasyp,
Saǵan «Altyn dombyra» aparamyz!
