Berlınde 65-shi ret uıymdastyrylǵan «Altyn aıý» kıno baıqaýynyń bas júldesi ırandyq rejıser Djafar Panahıdiń qanjyǵasynda ketti. Baıqaý barysynda onyń «Taksı» degen týyndysy úzdik dep tanylǵan. 

Rejıser óziniń saıası kózqarasyna baılanysty baıqaýǵa qatysa almaǵanyn aıta ketýimiz kerek. Óıtkeni, Iran bıligi onyń elden shyǵýyna úzildi-kesildi tyıym salǵan bolatyn. Qazirgi tańda Djafar Panahıdiń shyǵarmashylyq jumyspen aınalysýyna da tosqaýyl qoıylǵan. Baıqaýdy uıymdastyrýshylar «Taksı» fılminiń rejıserine kórsetilgen saıası qysymnyń bul jerde eshqandaı qatysy joq ekenin aıtty. Mamandardyń paıymdaýynsha, bul fılmdi alǵash kórgen adamdar derekti fılmmen shatastyryp alýy múmkin. Biraq oqıǵa jelisi, taksıshiniń túrli adamdarmen tildesip, túrli oqıǵalarǵa tap bolýy shynaıy ómirdi dál beıneleıtinin kórkem týyndy ekenin baıqaýǵa bolady eken. Fılmde D. Panahıdiń ózi taksıshiniń rolin somdaǵan.