"ALMEKS" holdıńtik toby free float aksıalarynyń úlesin keńeıtýge kezeń-kezeńimen ótip jatyr, sondyqtan Halyk Bank AQ-da mınorıtarlyq úlesterdi satyp alý boıynsha usynystarǵa árdaıym ashyq. Bul rette aıta ketetin basty faktor - ol baqylaý paketin, ıaǵnı aksıalardyń keminde 51%-yn saqtaı otyryp, aksıalardyń ótimdiligin arttyrýǵa ári aksıonerler tobyn keńeıtýge basymdyq berý.
Bul týraly inbusiness.kz holdıńtiń baspasóz qyzmetiniń túsiniktemesine silteme jasap habarlaıdy.
"Aıta keteıik, bizdiń kompanıa 2019 jyly da osyǵan qatysty baspasóz habarlamasyn jarıalaǵan bolatyn. Onda biz halyqaralyq ınvestorlar qaýymdastyǵynyń kóptegen ótinishterine súıene otyryp, "ALMEKS" Halyk Bank aksıalarynyń ótimdiligin arttyrý boıynsha nusqalardy qarastyrýǵa daıyn ekenin atap óttik. Iaǵnı "ALMEKS" baqylaý paketin saqtaı otyryp, ózine tıesili aksıalardy baǵaly qaǵazdar naryǵynda shaǵyn pakettermen ishinara ıelikten shyǵarýǵa qarsy emes ekenin bildirgen bolatyn", - dep atap ótti inbusiness.kz tilshisimen bergen suhbatta.
Osyǵan baılanysty kompanıa kez-kelgen usynystar birinshi kezekte Bank aksıonerlerine tıimdiligi jaǵynan qarastyrylyp, qazirgi naryqtyń jaǵdaıy men bıznesti kapıtaldandyrýdyń ósimin eskere otyryp júrgiziletinin aıtyp otyr.
"Jalpy, aksıalardy ishinara satý – bul halyqaralyq qor bırjalarynda saýda jasaıtyn emıtent qaǵazdary úshin qalyptasqan halyqaralyq jáne qazaqstandyq tájirıbe. Kez-kelgen usynystar qolaıly naryqtyq jaǵdaıdy eskere otyryp qarastyrylatyndyǵyn erekshe atap ótkimiz keledi. Biz iri aksıoner retinde aksıalardyń ótimdiligin arttyrýǵa jáne Halyk Bank kapıtaldandyrýyn ulǵaıtýǵa múddelimiz", - dep qorytyndylady "ALMEKS".
Halyk Bank AQ - eldiń barlyq bank aktıvteriniń úshten birinen astamyn quraıtyn jáne tarmaqtalǵan qarjy ınfraqurylymyn qamtıtyn keń fılıaldyq jelisi bar Qazaqstannyń iri banki. Mysaly, eldegi árbir ekinshi bankomat Halyk Bank-ke tıesili, osydan-aq onyń el qarjy naryǵyndaǵy ornyn baıqaýǵa bolady. Ótken jyldyń jeltoqsan aıynyń basyndaǵy jaǵdaı boıynsha banktiń aktıvteri 13,7 trln teńgeden asady, al salymshylar aldyndaǵy jıyntyq mindettemeler 12 trln teńgege jýyq.
"Qazaqstan qor bırjasy" AQ derekteri boıynsha Halyk Bank naryqtyq kapıtaldandyrýy 3 mlrd AQSH dollarynan asady. Banktiń iri aksıonerleri - onyń jaı aksıalarynyń 69,52%-yna ıelik etetin "ALMEKS"Holdıńtik toby" AQ jáne qarapaıym aksıalardyń 28,51% nomınaldy ustaýshysy The Bank of New York.
