حولدينگ باقىلاۋ پاكەتىن ساقتاي وتىرىپ، ەركىن اينالىمداعى بانك اكسيالارىنىڭ ۇلەسىن جانە ولاردىڭ وتىمدىلىگىن ارتتىرۋ، كاپيتالداندىرۋ مەن  ولاردى ۇلعايتۋ جولىندا ينۆەستورلاردىڭ ۇسىنىستارىن تىڭداۋعا دايىن ەكەنىن مالىمدەدى.

"المەكس" حولدينگتىك توبى free float اكسيالارىنىڭ ۇلەسىن كەڭەيتۋگە كەزەڭ-كەزەڭىمەن ءوتىپ جاتىر، سوندىقتان Halyk Bank اق-دا مينوريتارلىق ۇلەستەردى ساتىپ الۋ بويىنشا ۇسىنىستارعا ءاردايىم اشىق. بۇل رەتتە ايتا كەتەتىن باستى فاكتور - ول باقىلاۋ پاكەتىن، ياعني اكسيالاردىڭ كەمىندە 51%-ىن ساقتاي وتىرىپ، اكسيالاردىڭ وتىمدىلىگىن ارتتىرۋعا ءارى اكسيونەرلەر توبىن كەڭەيتۋگە باسىمدىق بەرۋ.

بۇل تۋرالى inbusiness.kz حولدينگتىڭ باسپا ءسوز قىزمەتىنىڭ تۇسىنىكتەمەسىنە سىلتەمە جاساپ حابارلايدى.

"ايتا كەتەيىك، ءبىزدىڭ كومپانيا 2019 جىلى دا وسىعان قاتىستى باسپا ءسوز حابارلاماسىن جاريالاعان بولاتىن. وندا ءبىز حالىقارالىق ينۆەستورلار قاۋىمداستىعىنىڭ كوپتەگەن وتىنىشتەرىنە سۇيەنە وتىرىپ، "المەكس" Halyk Bank اكسيالارىنىڭ وتىمدىلىگىن ارتتىرۋ بويىنشا نۇسقالاردى قاراستىرۋعا دايىن ەكەنىن اتاپ وتتىك. ياعني "المەكس" باقىلاۋ پاكەتىن ساقتاي وتىرىپ، وزىنە تيەسىلى اكسيالاردى باعالى قاعازدار نارىعىندا شاعىن پاكەتتەرمەن ءىشىنارا يەلىكتەن شىعارۋعا قارسى ەمەس ەكەنىن بىلدىرگەن بولاتىن"، - دەپ اتاپ ءوتتى inbusiness.kz تىلشىسىمەن بەرگەن سۇحباتتا.

وسىعان بايلانىستى كومپانيا كەز-كەلگەن ۇسىنىستار ءبىرىنشى كەزەكتە بانك اكسيونەرلەرىنە تيىمدىلىگى جاعىنان قاراستىرىلىپ، قازىرگى نارىقتىڭ جاعدايى مەن بيزنەستى كاپيتالداندىرۋدىڭ ءوسىمىن ەسكەرە وتىرىپ جۇرگىزىلەتىنىن ايتىپ وتىر.

"جالپى، اكسيالاردى ءىشىنارا ساتۋ – بۇل حالىقارالىق قور بيرجالارىندا ساۋدا جاسايتىن ەميتەنت قاعازدارى ءۇشىن قالىپتاسقان حالىقارالىق جانە قازاقستاندىق تاجىريبە. كەز-كەلگەن ۇسىنىستار قولايلى نارىقتىق جاعدايدى ەسكەرە وتىرىپ قاراستىرىلاتىندىعىن ەرەكشە اتاپ وتكىمىز كەلەدى. ءبىز ءىرى اكسيونەر رەتىندە اكسيالاردىڭ وتىمدىلىگىن ارتتىرۋعا جانە Halyk Bank كاپيتالداندىرۋىن ۇلعايتۋعا مۇددەلىمىز"، - دەپ قورىتىندىلادى "المەكس".

Halyk Bank اق - ەلدىڭ بارلىق بانك اكتيۆتەرىنىڭ ۇشتەن بىرىنەن استامىن قۇرايتىن جانە تارماقتالعان قارجى ينفراقۇرىلىمىن قامتيتىن كەڭ فيليالدىق جەلىسى بار قازاقستاننىڭ ءىرى بانكى. مىسالى، ەلدەگى ءاربىر ەكىنشى بانكومات Halyk Bank-كە تيەسىلى، وسىدان-اق ونىڭ ەل قارجى نارىعىنداعى ورنىن بايقاۋعا بولادى. وتكەن جىلدىڭ جەلتوقسان ايىنىڭ باسىنداعى جاعداي بويىنشا بانكتىڭ اكتيۆتەرى 13،7 ترلن تەڭگەدەن اسادى، ال سالىمشىلار الدىنداعى جيىنتىق مىندەتتەمەلەر 12 ترلن تەڭگەگە جۋىق.

"قازاقستان قور بيرجاسى" اق دەرەكتەرى بويىنشا Halyk Bank نارىقتىق كاپيتالداندىرۋى 3 ملرد اقش دوللارىنان اسادى. بانكتىڭ ءىرى اكسيونەرلەرى - ونىڭ جاي اكسيالارىنىڭ 69،52%-ىنا يەلىك ەتەتىن "المەكس"حولدينگتىك توبى" اق جانە قاراپايىم اكسيالاردىڭ 28،51% نومينالدى ۇستاۋشىسى The Bank of New York.