Almatyda «Qalqaman» metro stantsiiasyn 2026 jyldyń sońyna deiin paidalanýǵa berý josparlanyp otyr. Bul týraly máslihat otyrysynda qalalyq Ekonomika jáne qarjy basqarmasynyń basshysy Baýyrjan Qudaibergenov málimdedi, dep habarlaidy dalanews.kz.
Onyń aitýynsha, biyl «Qalqaman» stantsiiasynan «Barlyq» stantsiiasyna deiingi metro jelisiniń qurylysyn bastaý jumystary qolǵa alynǵan. Sondai-aq metropolitendi odan ári keńeitý maqsatynda «Jibek joly» stantsiiasynan áýejaiǵa deiin sozylatyn ekinshi jeliniń jobalyq-smetalyq qujattamasyn ázirleý josparlanǵan.
Qalalyq biýdjetti naqtylaý kezinde jol infraqurylymyn damytýǵa da qosymsha qarajat qarastyrylǵan. Atap aitqanda, Rysqulov dańǵylyn qala shekarasyna deiin jalǵastyrý, Muqanov kóshesin Gogol kóshesinen Raiymbek dańǵylyna deiin uzartý jáne Raiymbek dańǵylyn Shyǵys ainalma avtomobil jolyna deiin jetkizý jumystary jalǵasady.
Jyl sońyna deiin Aqjar jáne Terekti shaǵynaýdandaryndaǵy jol qurylysy da aiaqtalýy tiis. Al «Batys qaqpa» politsentrinde joldar men injenerlik kommýnikatsiialar salý jalǵasady. Budan bólek, qoǵamdyq kólikti, onyń ishinde avtobýs tasymaldary men metropolitendi sýbsidiialaýǵa qosymsha qarjy bólinedi. Baýyrjan Qudaibergenovtiń sózinshe, biýdjetke engiziletin naqtylaýlar eń aldymen qala úshin ózekti máselelerdi sheshýge jáne bastalǵan jobalardy aiaqtaýǵa baǵyttalǵan.
Aita keteiik, 2026 jyldyń aqpan aiynda Almaty ákimdigi qoldanystaǵy «Baýyrjan Momyshuly» stantsiiasy men jańa «Qalqaman» stantsiiasynyń arasyndaǵy uzyndyǵy 1593 metr bolatyn oń jaq tonneldi qazý jumystary tolyq aiaqtalǵanyn habarlaǵan edi.
Sol kezde sol jaq tonnel tolyǵymen daiyn bolyp, onda relster men bailanys relsi tóselip, injenerlik kommýnikatsiialar ornatylǵan bolatyn. Ákimdik málimetinshe, «Qalqaman» stantsiiasynyń ǵimaraty da salynyp bitken. Nysanda árleý jumystary júrgizilip, poiyz qozǵalysyn avtomatty basqarý júiesine jáne stantsiia jumysyna qajetti ózge de júielerge arnalǵan jabdyqtar jetkizilgen.
Eske salsaq, 2026 jyldyń aqpanynda qala biligi jańa stantsiiany sol jyldyń birinshi jartyjyldyǵynyń sońyna deiin ashýǵa ýáde bergen edi. Al stantsiia jobasy 2017 jyly bekitilip, qurylys jumystary 2022 jyly bastalǵan.
