Алматыда «Қалқаман» метро станциясын 2026 жылдың соңына дейін пайдалануға беру жоспарланып отыр. Бұл туралы мәслихат отырысында қалалық Экономика және қаржы басқармасының басшысы Бауыржан Құдайбергенов мәлімдеді, деп хабарлайды dalanews.kz.
Оның айтуынша, биыл «Қалқаман» станциясынан «Барлық» станциясына дейінгі метро желісінің құрылысын бастау жұмыстары қолға алынған. Сондай-ақ метрополитенді одан әрі кеңейту мақсатында «Жібек жолы» станциясынан әуежайға дейін созылатын екінші желінің жобалық-сметалық құжаттамасын әзірлеу жоспарланған.
Қалалық бюджетті нақтылау кезінде жол инфрақұрылымын дамытуға да қосымша қаражат қарастырылған. Атап айтқанда, Рысқұлов даңғылын қала шекарасына дейін жалғастыру, Мұқанов көшесін Гоголь көшесінен Райымбек даңғылына дейін ұзарту және Райымбек даңғылын Шығыс айналма автомобиль жолына дейін жеткізу жұмыстары жалғасады.
Жыл соңына дейін Ақжар және Теректі шағынаудандарындағы жол құрылысы да аяқталуы тиіс. Ал «Батыс қақпа» полицентрінде жолдар мен инженерлік коммуникациялар салу жалғасады. Бұдан бөлек, қоғамдық көлікті, оның ішінде автобус тасымалдары мен метрополитенді субсидиялауға қосымша қаржы бөлінеді. Бауыржан Құдайбергеновтің сөзінше, бюджетке енгізілетін нақтылаулар ең алдымен қала үшін өзекті мәселелерді шешуге және басталған жобаларды аяқтауға бағытталған.
Айта кетейік, 2026 жылдың ақпан айында Алматы әкімдігі қолданыстағы «Бауыржан Момышұлы» станциясы мен жаңа «Қалқаман» станциясының арасындағы ұзындығы 1593 метр болатын оң жақ тоннельді қазу жұмыстары толық аяқталғанын хабарлаған еді.
Сол кезде сол жақ тоннель толығымен дайын болып, онда рельстер мен байланыс рельсі төселіп, инженерлік коммуникациялар орнатылған болатын. Әкімдік мәліметінше, «Қалқаман» станциясының ғимараты да салынып біткен. Нысанда әрлеу жұмыстары жүргізіліп, пойыз қозғалысын автоматты басқару жүйесіне және станция жұмысына қажетті өзге де жүйелерге арналған жабдықтар жеткізілген.
Еске салсақ, 2026 жылдың ақпанында қала билігі жаңа станцияны сол жылдың бірінші жартыжылдығының соңына дейін ашуға уәде берген еді. Ал станция жобасы 2017 жылы бекітіліп, құрылыс жұмыстары 2022 жылы басталған.
