Almatynyń Medeý aýdanynda qoima ǵimaratynan shyqqan órt kezinde jalynnyń kórshi turǵyn úi men ǵimarattarǵa taralý qaýpi týyndady, dep habarlaidy dalanews.kz.
Tótenshe jaǵdailar ministrliginiń málimetinshe, Tátibekov kóshesinde ornalasqan bir qabatty qoima ǵimaratynyń shatyry órtenip, qyzyl jalyn 280 sharshy metr aýmaqty sharpyǵan.
Vedomstvonyń habarlaýynsha, aptap ystyq saldarynan órtti sóndirý jumystary qiyndap, jalynnyń tez taralý qaýpi bolǵan. Alaida órt sóndirýshiler tilsiz jaýdy der kezinde oqshaýlap, tolyq sóndirdi. Zardap shekkender joq.
«Órtti sóndirý barysynda qutqarýshylar jalynnyń kórshi ornalasqan jeke turǵyn úige, irgeles ǵimaratqa taralýyna jol bermedi. Sondai-aq shatyrdyń búkil aýmaǵyn sharpyp ketý qaýpiniń aldyn aldy. Jasyryn janý oshaqtaryn anyqtaý úshin shatyrdyń konstrýktsiialary bólshekteldi», – dep málimdedi TJM.
Ministrlik azamattardy órt qaýipsizdigi talaptaryn saqtaýǵa, órt shyqqan jaǵdaida 112 nómirine dereý habarlaýǵa jáne iri órtti óz betinshe sóndirýge áreket jasamaýǵa shaqyrdy.
