Áleýmettik jelilerde Almatydaǵy Esentai ózeniniń jaǵasynda ornalasqan, buryn Qairat Satybaldyǵa tiesili bolǵan qonaqúi ǵimaratynyń súriletini týraly aqparat tarady, dep habarlaidy dalanews.kz.
Jelide jariialanǵan videoda ǵimarat mańynda qurylys jumystary júrip jatqany kórinedi.
Avtorlardyń biri: «Almatydaǵy eń ádemi ǵimarattardyń biri súrilip jatyr. Osy ýaqytqa deiin paidalanylmai qaldy», – dep jazǵan.
Alaida Almaty ákimdigi bul aqparattyń shyndyqqa janaspaitynyn málimdedi. Ákimdiktiń habarlaýynsha, burynǵy qonaqúi ǵimaraty buzylyp jatqan joq. Kerisinshe, nysanda aýqymdy jóndeý jáne qalpyna keltirý jumystary júrgizilýde.
Vedomstvo ókilderiniń málimetinshe, ǵimarat uzaq ýaqyt boiy qanaǵattanarlyqsyz jaǵdaida bolǵan. Qazir munda qasbetti qalpyna keltirý, tereze oiyqtaryn jóndeý, ishki bólmelerdi jańartý jáne aýmaqty abattandyrý jumystary qolǵa alynǵan. Joba aiasynda nysanǵa kúrdeli jóndeý júrgizilip, keiin paidalanýǵa berý kózdelgen.
Ákimdik jobanyń investory «LeanQor» JShS ekenin atap ótti. Al «Almaty» áleýmettik-kásipkerlik korporatsiiasy ǵimaratty jóndeý jumystaryn júrgizý jáne ony qaita paidalanýǵa berý úshin usynyp otyr. Barlyq shyǵyndardy investor óz qarajaty esebinen óteidi.
Qala ákimdiginiń túsindirýinshe, ǵimaratty buzýdyń ornyna ony Almaty IT-haby retinde qaita beiimdeý týraly sheshim qabyldanǵan. Bul joba Memleket basshysynyń IT jáne jasandy intellekt infraqurylymyn damytý, mamandar daiarlaý jáne osy baǵyttaǵy quzyretterdi arttyrý jónindegi tapsyrmasy aiasynda júzege asyrylyp jatyr.
«Qalada osyndai deńgeidegi zamanaýi nysandarǵa suranys bar bolǵandyqtan, buryn jeke menshikte bolǵan jáne bos turǵan ǵimaratty súrmei, jańa maqsatqa paidalaný jóninde sheshim qabyldandy», – dep málimdedi ákimdikten.
Joba iske asqannan keiin nysan qoldanystaǵy infraqurylymdy tiimdi paidalanýǵa jáne IT, jasandy intellekt pen oǵan jaqyn salalardyń damýyna múmkindik beredi dep kútilýde.
Ákimdik málimetine sáikes, jóndeý jumystary aiaqtalǵan soń ǵimarat pen oǵan tiesili jer telimi Almaty qalasynyń Tsifrlandyrý basqarmasyna beriledi. Bolashaqta munda tsifrlandyrý jáne jasandy intellekt salasyndaǵy memlekettik baǵdarlamalar júzege asyrylyp, IT, AI jáne kreativti indýstriialar baǵytynda jumys isteitin kompaniialar men rezidentter ornalasady.
