Almatydaǵy meditsinalyq mekemelerdiń birinde mamyr aiynda kóz jumǵan 32 jastaǵy júkti áieldiń ólimine qatysty tergeý jalǵasyp jatyr. Marqumnyń týystary resmi túsindirmelermen kelispeitinderin aityp, qaiǵyly oqiǵanyń barlyq mán-jaiyn ashyq ári jan-jaqty tekserýdi talap etip jatyr, dep habarlaidy dalanews.kz Astana telearnasyna silteme jasap.
Týystarynyń aitýynsha, Anna Efimenko júktiliktiń segizinshi aiynda bolǵan jáne aýrýhanaǵa túskenge deiin onyń jaǵdaiy alańdaýshylyq týǵyzbaǵan. Alaida densaýlyǵy kúrt nasharlaǵannan keiin áiel aldymen №2 qalalyq aýrýhanaǵa jetkizilip, keiin №5 qalalyq aýrýhanaǵa aýystyrylǵan. Sol jerde ol kóz jumǵan. Jaqyndarynyń sózinshe, jaǵdai kútpegen jerden jáne óte jyldam órbigen.
Marqumnyń jubaiy Aleksei Efimenko áieliniń jaǵdaiy kúrt nasharlaǵanyn aityp, buǵan deiin eshqandai qaýip belgisi bolmaǵanyn jetkizdi.
Sábidi qutqarý múmkin bolmaǵan
Meditsinalyq mekemede áielge shuǵyl túrde kesar tiligi jasalǵan. Alaida dárigerler sábidi aman alyp qala almaǵan. Bir táýlikten keiin naýqastyń ózi de qaitys bolǵan.
Marqumnyń otbasy osy ýaqytqa deiin birqatar mańyzdy suraqtarǵa jaýap almaǵandaryn aitady. Ásirese, olar sábidiń naqty qai ýaqytta jáne qandai jaǵdaida kóz jumǵanyna qatysty málimetterdiń túsiniksiz ekenin alǵa tartyp otyr. Marqumnyń ápkesi Alena Gradochiv bul týraly keshke qarai ǵana habardar bolǵandaryn aitty.
– Balanyń qaitys bolǵanyn tek keshke qarai bildik... Al qujattarda basqa ýaqyt kórsetilgen, – dedi ol.
Saraptama qorytyndysy
Almaty qalasynyń qoǵamdyq densaýlyq saqtaý basqarmasy is boiynsha túpkilikti qorytyndy sot-meditsinalyq saraptama aiaqtalǵannan keiin jasalatynyn málimdedi. Oǵan deiin is materialdary jariia etilmeidi.
Sonymen qatar oqiǵanyń mán-jaiyn Meditsinalyq jáne farmatsevtikalyq baqylaý komitetiniń departamenti de tekserip jatyr.
Marqum áielden eki balasy qalǵan.
