Almatyda burynǵy din qyzmetkeri Iakov Vorontsovqa qatysty sot otyrysy sýdianyń basqa qylmystyq is boiynsha keńesý bólmesinde bolýyna bailanysty keiinge qaldyryldy, dep habarlaidy dalanews.kz.
Búgin saǵat 15:00-de Vorontsovtyń isi boiynsha negizgi sot talqylaýyn bastaý josparlanǵan. Alaida otyrys bastalmai turyp, advokat Ǵalym Nurpeiisovke sot otyrysynyń hatshysy sýdianyń basqa qylmystyq is boiynsha keńesý bólmesinde bolýyna bailanysty sot otyrysy keiinge shegeriletinin habarlaǵan.
«Saǵat 15:00-ge Iakov Vorontsovtyń isi boiynsha negizgi sot talqylaýy belgilengen bolatyn. Alaida sot otyrysynyń hatshysy maǵan sýdianyń basqa qylmystyq is boiynsha keńesý bólmesinde bolýyna bailanysty otyrys keiinge qaldyrylatynyn aitty», – dedi advokat.
Tergeý nusqasy boiynsha Vorontsovqa Qazaqstan Respýblikasy Qylmystyq kodeksiniń 296-babynyń 4-bóligi – esirtki quraldaryn, psihotroptyq zattardy jáne olardyń analogtaryn ótkizý maqsatynsyz zańsyz ainalymǵa jiberý, sondai-aq 302-baptyń 1-bóligi – esirtki pritonyn ustaý boiynsha aiyp taǵylǵan.
Is Almaty qalasynyń Medeý aýdandyq sotynyń №2 sotynda sýdia Jasulan Hýsainovtyń qaraýynda.
Búgin is boiynsha negizgi sot talqylaýy bastalýy tiis bolǵan.
Buǵan deiin sot óz qaýlysynda sot talqylaýynyń jariialylyǵyn shekteýge negiz joq ekenin kórsetken. Osylaisha, is boiynsha sot otyrystary ashyq formatta ótýi tiis.
Sot Vorontsovqa qatysty qamaýda ustaý túrindegi bultartpaý sharasyn is sotta qaralyp jatqan kezeńge saqtap qaldy.
Buǵan deiin QazTAG Vorontsovtyń qamaýda otyrǵan kezinde hat jazǵanyn, keiin ony advokaty jariialaǵanyn habarlaǵan. Burynǵy din qyzmetkeri ózine taǵylǵan aiyptardy joqqa shyǵaryp, istiń Qazaqstanda Resei pravoslav shirkeýine (RPSh) táýelsiz pravoslav shirkeýin qurý áreketimen bailanysty ekenin aitqan.
Vorontsovtyń málimdeýinshe, esirtki zattary oǵan ádeii salynǵan jáne onyń páterinde esirtki pritony bolýy múmkin emes.
5 naýryzda Vorontsovtyń qorǵaýshylary onyń qamaýda ustaý túrindegi bultartpaý sharasyn úiqamaqqa nemese kepilge aýystyrýdy suraǵanyn habarlaǵan. Qorǵaý tarapy mundai ótinishti Vorontsovtyń densaýlyq jaǵdaiymen jáne oǵan em qabyldaý qajettiligimen bailanystyrǵan. Alaida sot bultartpaý sharasyn ózgertý týraly ótinishti qanaǵattandyrmaǵan.
Vorontsov Qazaqstan qoǵamyn alańdatqan birqatar ózekti máselege qatysty ashyq syni ustanymymen tanylǵan. 2023 jylǵy 19 maýsymda QazTAG onyń din qyzmetin toqtatýǵa sheshim qabyldaǵanyn habarlaǵan.
Sondai-aq 9 naýryzda Vorontsov AQSh-tyń Halyqaralyq dini bostandyq jónindegi komissiiasy (USCIRF) dini senimine bailanysty qýdalanǵan adamdardyń derekter bazasyna engizgen tulǵalardyń qataryna qosylǵany týraly aqparat taraǵan.
