Almatydaǵy ALT University oqý ornynda ótken diplom tabystaý rásimi eki túlek úshin erekshe este qaldy. Olar diplom alǵan kúni-aq Jol aktivteri sapasynyń ulttyq ortalyǵy Almaty qalalyq filialyna jumysqa qabyldandy, dep habarlaidy dalanews.kz.
Saltanatty sharaǵa Jol aktivteri sapasynyń ulttyq ortalyǵy Almaty qalalyq filialynyń direktory Máýlen Álipov qatysyp, jol-kólik salasynyń jas mamandaryna diplomdaryn tabystady.
Túlekterdi quttyqtaǵan filial direktory olardyń aldaǵy eńbek jolyna sáttilik tilep, elimizdiń jol infraqurylymyn damytýda bilikti kadrlardyń róli erekshe ekenin atap ótti.
«Búgin sizder úshin jańa kezeń bastalyp otyr. Jol salasy – úlken jaýapkershilik pen kásibi biliktilikti talap etetin mańyzdy baǵyt. Elimizdiń igiligi úshin adal eńbek etip, alǵan bilimderińizdi is júzinde dáleldeisizder dep senemin. Barshańyzǵa tabysty mansap pen tolaǵai jetistikter tileimin», – dedi Máýlen Álipov.
Is-sharanyń eń jaǵymdy sátteriniń biri – ALT University-diń eki túleginiń diplom alǵan kúni-aq Jol aktivteri sapasynyń ulttyq ortalyǵy Almaty qalalyq filialyna jumysqa qabyldanýy boldy. Bul – oqý ornynda alǵan bilimniń eńbek naryǵynda suranysqa ie ekeniniń jáne jumys berýshiler men joǵary oqý oryndary arasyndaǵy bailanystyń naqty nátijesi.
ALT University búginde Qazaqstannyń jol-kólik salasyna injenerler men tehnikalyq mamandar daiarlaityn jetekshi joǵary oqý oryndarynyń biri sanalady. Ýniversitet túlekteri elimizdiń jol qurylysy, jobalaý, jol sapasyn baqylaý jáne kólik infraqurylymyn damytý baǵyttarynda eńbek etip keledi.
Mamandardyń pikirinshe, óndiris pen bilim berý uiymdarynyń osyndai áriptestigi jas mamandardyń jumysqa tez beiimdelýine, al salanyń bilikti kadrlarmen tolyqtyrylýyna múmkindik beredi.
