Almaty qalasy Qoǵamdyq densaýlyq saqtaý basqarmasynyń málimetinshe, aptap ystyq kezeńinde qalada shuǵyl meditsinalyq kómekke júginýshiler sany kóbeigen. Dárigerlerdiń aitýynsha, joǵary temperatýra ásirese qart adamdar, balalar, júkti áielder jáne sozylmaly aýrýy bar naýqastar úshin asa qaýipti, dep habarlaidy dalanews.kz.
Almaty qalalyq Jedel meditsinalyq járdem qyzmeti direktorynyń mindetin atqarýshy orynbasary Azamat Qurmanbekovtiń aitýynsha, ystyq kúnderi júrek-qan tamyrlary júiesine túsetin júkteme aitarlyqtai artady. Aýa temperatýrasynyń joǵary bolýy qan qysymynyń kúrt kóterilýine, júrek yrǵaǵynyń buzylýyna, entigýge, sondai-aq miokard infarkti men insýlt qaýpiniń artýyna sebep bolýy múmkin.
Tek shilde aiynyń alǵashqy eki aptasynda jedel járdem qyzmetine 33,6 myńnan astam shaqyrtý túsken. Onyń ishinde shamamen 1,5 myńy arteriialyq qysymnyń joǵarylaýyna bailanysty bolsa, taǵy 300-den astamy júrek-qan tamyrlary aýrýlaryna, sonyń ishinde júrektiń ishemiialyq aýrýy men jedel miokard infarktine qatysty bolǵan. Budan bólek, mi qan ainalymynyń jedel buzylysyna ushyraǵan 50-ge jýyq naýqas shuǵyl túrde qalalyq aýrýhanalarǵa jetkizilgen.
Aldyńǵy kezeńmen salystyrǵanda, kún ótý saldarynan jedel járdem shaqyrýdy qajet etken jaǵdailar eki ese kóbeigen.
Basqarma mamandarynyń aitýynsha, aptap ystyq aǵzanyń sýsyzdaný qaýpin, taǵamnan ýlaný, ishek infektsiialarynyń taralý yqtimaldyǵyn arttyryp, maýsymdyq allergiia belgilerin kúsheitedi. Sondyqtan sozylmaly aýrýy bar azamattarǵa densaýlyǵyna erekshe kóńil bólý kerek. Olar dárigerdiń nusqaýlaryn qatań saqtap, dári-dármekterin ýaqytyly qabyldap, qan qysymy men qandaǵy qant deńgeiin turaqty baqylap, qyzyp ketýden saqtanyp, josparly meditsinalyq tekserýdi ótkizip almaýy qajet.
Almaty qalasynyń emhanalary sozylmaly aýrýy bar naýqastardy dispanserlik baqylaýdy jalǵastyryp, olardy qajetti dári-dármekpen qamtamasyz etip, densaýlyq jaǵdaiyna turaqty monitoring júrgizýde. Eger adamnyń jaǵdaiy nasharlasa, asqynýdy kútpei, ýaqytyly ýchaskelik dárigerge qaralǵan jón.
Dárigerler múmkindiginshe saǵat 11:00-den 17:00-ge deiin kúnniń tikelei sáýlesinde júrmeýge, tabiǵi matadan tigilgen jeńil kiim, bas kiim jáne kúnnen qorǵaityn kózildirik kiiýge keńes beredi.
Sondai-aq, suiyqtyqty jetkilikti mólsherde ishý óte mańyzdy. Meditsinalyq qarsy kórsetilim bolmasa, eresekterge táýligine keminde 2 litr sý ishý usynylady. Sonymen qatar alkogoldi ishimdikterdi, tátti gazdalǵan sýsyndardy jáne kofeni shamadan tys tutynýdy shekteý qajet.
Eger adamnyń basy qatty aýyryp, basy ainalsa, álsizdik, júrek ainý, sananyń shatasýy, dene qyzýynyń kóterilýi nemese esinen taný belgileri baiqalsa, ony dereý salqyn jerge aparyp, denesin salqyndatý sharalaryn jasap, az-azdan sý berip, jedel meditsinalyq járdem shaqyrý qajet.
Almaty qalasy Qoǵamdyq densaýlyq saqtaý basqarmasy qarapaiym saqtyq sharalaryn saqtaý jáne ýaqytyly meditsinalyq kómekke júginý aptap ystyq kezinde densaýlyqqa tónetin qaýip-qaterdi azaitýǵa kómektesetinin eske salady.
