Almatyda 5 jasar bala saýsaǵyn qaqpaǵa qysyp alǵan. Saldarynan saýsaǵy túbinen julynyp túsken. №2 balalar aýrýhanasynda oǵan asa kúrdeli ota jasaldy, dep habarlaidy dalanews.kz.
Ata-anasynyń aitýynsha, búldirshin aýlada oinap júrip, oń qolynyń bir saýsaǵyn metall qaqpaǵa qysyp alǵan. Saldarynan saýsaq túbinen julynyp túsken. Ata-anasy balany dereý aýrýhanaǵa jetkizgen.
Kezekshi dárigerler, mikrohirýrg pen bólimshe jetekshisi konsiliým jasap, ýaqyt tyǵyzdyǵyna bailanysty jedel saýsaq tinderiniń qyzmetin qalpyna keltirý otasyna kirisken.
Mikroskoppen jasalǵan ota tórt saǵatqa sozylǵan. Zaqymdanǵan tamyrlar men júike talshyqtaryn qalpyna keltirý úshin mikroskopsyz kózge kórinbeitin jińishke hirýrgiialyq jip qoldanylǵan.
Hirýrg mamandar diametri 1 millimetrden aspaityn kúretamyrdy, sińirdi, júike talshyqtary men tamyrlardy jalǵap, julynyp ketken saýsaqtyń qyzmetin qalpyna keltirgen.
Bala otadan keiin de dárigerlerdiń jiti baqylaýynda bolǵan. Mamandar jalǵanǵan saýsaqtyń jazylý protsesi men oń qoldyń qalpyna kelý barysyn muqiiat qadaǵalaǵan.
