Almaty turǵyny páter rásimdeý kezinde memlekettik derekter bazasyndaǵy qateni anyqtady. Qujattardy teksergen bank júiesi onyń atyna eki neke tirkelgenin kórsetip, kelisimshart jasaýǵa ruqsat bermegen, dep habarlaidy dalanews.kz.
Ol bul jaǵdai týraly Threads áleýmettik jelisinde jazdy. Áieldiń sózinshe, bankke páter qujattaryna qol qoiýǵa barǵan kezde júie ótinimdi qabyldamaǵan. Tekserý barysynda onyń atyna bir kúnde jáne bir jylda eki neke tirkelgeni belgili bolǵan.
“Eki jazbadaǵy neke tirkelgen kún birdei. Bireýinde erli-zaiyptylardyń tegi durys kórsetilse, ekinshisinde qate jazylǵan”, – deidi ol.
Almatylyq kelinshek máseleniń mán-jaiyn anyqtaý úshin AHAT bólimine júgingen. Onyń aitýynsha, mekeme qyzmetkerleri buryn tájiribeden ótip júrgen maman derekterdi kompiýterge qate engizgenin túsindirgen.
Bul aqparat elektrondy úkimet portalyndaǵy jeke kabinette kórinbeidi. Alaida áieldiń málimdeýinshe, eki neke týraly jazbany AHAT qyzmetkerleri men bank júiesi kóredi. Ol tegindegi qateni eGov arqyly da, halyqqa qyzmet kórsetý ortalyǵyna baryp ta túzetýge tyrysqan. Biraq HQKO júiesinen qate anyqtalmaǵandyqtan, ótinishi nátijesiz qalǵan.
Qujattaǵy sáikessizdik saldarynan turǵynnyń páterge qatysty mámilesi keiinge shegerilgen. Ol qazaqstandyqtarǵa mańyzdy kelisim jasamas buryn jeke qujattary men memlekettik derekter bazasyndaǵy málimetterdi aldyn ala tekserýge keńes berdi.
