Almaty oblysynda «Taza Qazaqstan» ekologiialyq baǵdarlamasy aiasyndaǵy sharalar jalǵasýda. Búgin óńirde ádettegidei «Taza beisenbi» aktsiiasy ótkizilip, 22 myńnan astam turǵyn tańmen talasa tazalyq jumysyna atsalysty. Igi sharada azamattar qorshaǵan ortaǵa qamqorlyq pen jaýapkershilik seziminiń úlgisin kórsetti. Olardyń qatarynda qoǵam belsendileri, oblys ákimdigi men memlekettik organ qyzmetkerleri, kásipkerler, jastar men eriktiler, turǵyndar bar. Nátijesinde 510 tonna qoqys shyǵarylyp, 282 gektar aýmaq tazartyldy, dep habarlaidy dalanews.kz.
Aktsiia barysynda qoǵamdyq oryndar men aýlalardaǵy qoqys jinalyp, abattandyrý jumysy júrgizildi. Qaita óńdeletin qaldyq bólek suryptalyp, qalǵan qoqys arnaiy poligonǵa jiberildi.
Senbilikke Almaty oblysynyń ákimi Marat Sultanǵaziev te qatysyp, qorshaǵan ortanyń tazalyǵy barshanyń ortaq qundylyǵy ekenin atap ótti.
«Ózimiz ómir súretin eldi mekenderdiń, qalalardyń, týristik oryndardyń taza ári jaily bolýy árqaisymyzdyń janashyrlyǵymyz ben jaýapkershiligimizge tikelei bailanysty. Búginde «Taza Qazaqstan» baǵdarlamasy aiasynda oblysymyzda eldi mekenderdi abattandyrý, kógaldandyrý jáne ekologiialyq mádenietti qalyptastyrý baǵytynda júieli jumystar júrgizilýde.
Jaqynda aýmaqtardy kútip ustaýǵa qatysty qoldanystaǵy talaptar jańartyldy. Soǵan sáikes aýmaqtyń sanitarlyq tazalyǵyn saqtaý jáne turǵyn úidiń irgeles 5 metr aýmaǵyn kútip-ustaý mindeti zańdy tulǵalarmen qatar jeke turǵyndarǵa da júkteledi. Osyǵan bailanysty aktsiia burynǵydan da belsendi túrde júzege asyrylyp jatyr. Búgin biz dástúrli «Taza beisenbi» aktsiiasyn ótkizdik. Oblystyń túkpir-túkpinidegi turǵyndar bul sharaǵa beijai qaramai, belsendilik tanytýda», – dedi Marat Eleýsizuly.
Ekologiialyq aktsiiaǵa úles qosqandardyń biri – Jastar resýrstyq ortalyǵynyń mamany Sanjar Sultan.
«Ár azamattyń tazalyq sharalaryna atsalysýy mańyzdy. Sebebi tártip pen tazalyq eń áýeli ózimizden bastalady. Qazir jastar ár senbilikke úlken jaýapkershilikpen kirisedi. Ózderi de túrli ekologiialyq sharalar uiymdastyryp, jumyla jumys isteidi. Máselen, «Qaýipsiz jaǵalaý», «Taza jaǵalaý» siiaqty aktsiialar sonyń aiqyn dáleli. Bul «Zań men tártip» tujyrymdamasymen de astasyp jatyr. Qazirgi jastardyń kózqarasy ózgeshe, sondyqtan olardy qoǵamdyq tártip pen ekologiialyq mádenietti saqtaýǵa jańa tásilder arqyly baýlý mańyzdy dep oilaimyn», – dedi ol.
Aita keteiik, jyl basynan beri óńirde 25 oblystyq senbilik ótkizilip, oǵan 567 myńnan astam adam qatysty. Nátijesinde 13 myń tonna qoqys shyǵarylyp, 7701 gektar aýmaq tazartyldy. 103 myńnan astym kóshet otyrǵyzylyp, 3500-ge jýyq tehnika jumyldyryldy. Bul baǵyttaǵy sharalar aldaǵy ýaqytta da dástúrli túrde jalǵasady.
