Qoǵamdyq belsendi Sanjar Boqaev Almatyda materialdardyń urlanýy múmkin ekenin aitty. Onyń sózinshe, merdigerler sheneýniktermen birge abattandyrý degen jeleýmen kóshelerden áli jańa brýschatkany alyp, ony jeke nysandarǵa áketip jatyr. Belsendi bul sátterdiń barlyǵyn videoǵa túsirip, áleýmettik jelisinde jariialady, dep habarlaidy Dalanews.kz.
27 tamyz kúni tańerteń Boqaev «12 ai» alleiasynda jumysshylardyń biýdjet esebinen alynǵan jańa plitkany buzyp, manipýliatorǵa tiep jatqanyn baiqaidy. Belsendi júk kóligin baqylap otyryp, onyń Jandosov aýylyna jetkenin kóredi. Onda brýschatka jeke úidiń janyna túsirile bastaǵan.
Boqaev politsiia shaqyryp, iske jedel-tergeý tobyn tartýdy talap etti.
"Plitka áli jaqsy kúide turdy, aýystyrýdyń qajeti bolǵan joq. Olar sapaly brýschatkany sheship alyp, satyp jiberedi. Al ornyna sál ózgeshe, biraq jańa plitka tóseidi. Aqsha igeriledi, materialdar joǵalady", – dedi belsendi.
Ýálihanov kóshesin abattandyrýǵa biýdjetten 490 million teńge jumsalǵan. Alaida, Boqaevtyń aitýynsha, qarajat jaramdy jabyndardy buzyp, aýystyrýǵa ketip jatyr. Al bul kezde qaladaǵy eki júzden astam kóshe áli asfalt kórmegen.
Belsendiniń aitýynsha, «oblavadan» keiin manipýliatorlardyń biri plitkany túsirmei, Almatydaǵy ákimdik bazasyna qaitaryp bergen. Munyń bári onyń kóz aldynda bolǵan. Boqaev buny materialdy zańsyz satýǵa árekettengenniń dáleli dep esepteidi. Biraq belsendiniń aralasýynyń arqasynda bul jospar júzege aspaǵan.
Almatylyqtar da jaǵdaiǵa narazy:
"Men aitamyn: «Nege buny áketip jatyrsyzdar? Esh bolmasa bizdiń aýlalarǵa ákeler edińizder. Bul sumdyq qoi, varvarlyq", – deidi áiel belsendimen áńgimesinde.
Boqaev mundai júie burynǵy ákim Erbolat Dosaev tusynda paida bolǵanyn, al qazirgi qala basshysy ázirge jaǵdaiǵa aralasyp úlgermegenin aitty.
"Sizder bizden buryn baryp, munyń bárin toqtatýlaryńyz kerek edi. Qaida boldyńyzdar?", – dedi ol.
Belsendi jinalǵan materialdardy Antikorrýptsiialyq qyzmet pen UQK-ge berýge ýáde etti.
