Mamandar aldaǵy kúnderi Almatyny basyp qalǵan kók tútin seiiletinin málimdedi, dep habarlaidy Dalanews.kz Almaty.tv-ǵa siltep.
Sinoptikterdiń boljaýynsha, jeltoqsanda almatylyqtardyń tynysy ashyla túspek. Qystyń alǵashqy kúnderi qoiýlanyp, qalany basyp qalǵan kók tuman seiiledi.
Jańbyrly kúnderi megapolisti jailaityn kók tútindi kókten quiylǵan tamshylar tazartyp, tabiǵi súzgige ainalady. Aýadaǵy kórinbeitin shań-tozań men usaq ziian bólshekterdi jańbyr jerge qarai túsirip, kókjiekti ashady. Ekologtardyń aitýynsha, qýatty jańbyrdan keiin nebári birneshe saǵat ishinde aýanyń lastaný kórsetkishi 80 paiyzǵa tómendeidi. Ásirese, PM2.5 siiaqty qaýipti bólshekter aitarlyqtai azaiady. Bul – qala tynysyn keńeitetin negizgi faktor.
"Aýadaǵy lastaýshy zattar taralýyna, seiilýine meteojaǵdaidyń áseri kóp. Biyl jaýyn-shashyn óte az boldy. Sonyń kesirinen ózenderdiń de, atmosferanyń da lastanýy kúsheidi. Jaýyn jaýmaǵandyqtan ziian aýa qaldyqtary turyp qalady. Biyl jel de sirek, al jeldiń bolmaýy ekologiialyq jaǵdaidy qiyndatyp, aýa sapasyn edáýir nasharlatty. Qazir meteojaǵdai ózgerip jatyr", – dedi Qazaqstan ekologiialyq aýditorlar palatasy oqý ortalyǵynyń direktory Raidin Qasymov.
Almatyda aldaǵy kúnderi aýa raiy qubylmaly bolady.
"Jaýyn mólsheri ortasha deńgeide 3-4 mm bolǵan jaǵdaida aýany tazartady. Jańbyr aýadaǵy tuman men tútindi seiiltedi", – dedi "Qazgidromet" RMK baspasóz hatshysy Arýjan Muratova.
Mamandardyń aitýynsha, jaýyndy-jeldi kúnderi qala atmosferasy birneshe ese tazaryp, eń qolaily kezeńge ainalýyna yqpal etpek.
