Almatyda metronyń jańa beketine deıingi tonnel qazý jumystary aıaqtaldy, dep habarlaıdy Dalanews.kz.
"Baýyrjan Momyshuly" metro beketi men jańa "Qalqaman" beketi arasyndaǵy uzyndyǵy 1593 metr bolatyn oń jaq baǵyttaǵy tonneldi qazý jumystary tolyq aıaqtaldy.
Sol jaq baǵyttaǵy tonnel tolyq daıyn: onda baılanys relsi ornatylyp, barlyq ınjenerlik jeli montajdalǵan.
Sonymen qatar, "Qalqaman" beketi ǵımaratynyń qurylysy aıaqtalyp, búginde ishki árleý jumystary júrgizilip jatyr.
Bas merdiger uıym ókili Murat Úkshebaevtyń aıtýynsha, qala basshylyǵy qoıǵan mindetke sáıkes nysan qurylysy táýlik boıy júrgizilip jatyr. Normatıvtik merzim 24 aı bolǵanyna qaramastan, bekettiń negizgi qurylysy shamamen 11 aı ishinde júzege asyrylǵan.
Qurylys-montaj jumystary bıylǵy jyldyń birinshi jartyjyldyǵynyń sońyna deıin tolyq aıaqtalady dep josparlanyp otyr.
