Almatylyq politseiler jedel júrgizgen shara barysynda «Respýblika» jáne «Almaty» alańdary mańyndaǵy birneshe qaltarys jerlerden jandyrǵysh suiyq zat quiylǵan bótelkeler, onshaqty armatýra kesindileri men ishinde benzini bar kanistrler tabylypty. Sonymen qatar, Almaly jáne Medeý aýdandaryndaǵy 2 páterdi tintigen poltseiler Makarov jáne «TT» tapanshalaryn, birneshe ondyq oq-dárisi bar tegis uńǵyly sholaq myltyqtardy, RGD-5 tórt granaty, sondai-aq jalpy somasy 5 million teńgeni quraityn aqshalai qarajat taýyp, tárkilepti. Jedel júrgizgen jumystardyń nátijesinde 5 adam kúdikti retinde ustalyp, qamaýǵa alynǵany taǵy ras eken.
Sodan, máseleniń anyq-qanyǵyn bilmek bolyp, Almaty qalalyq IID-niń baspasóz hatshysy Saltanat Ázirbekke habarlastyq.
-Sáke, aiaq-astynan «Respýblika» men «Almaty» alańdarynan jarylǵysh zattar tabylypty degen aqparat qaidan shyqty?
-Ras, Almatynyń eki úlken alańyna jaqyn mańaidan jarylǵysh zattar men janarmai quiylǵan bótelkeler, sholaq kesilgen temir-tersekter tabyldy, tárkilendi.
-Bul nege búgin tabylyp otyr? Bul týraly sizderge kimder habarlady?
-Jalpy aqparattardy bizge qala turǵyndary habarlap aitty. Keiin tergeý jumystary júrgizilgende, aqparttyń ras ekendigi anyqtalyp, shyn máninde atalyp kórsetilgen oryndardan jarylǵysh zattar tabyldy.
-Naqty qai ýaqytta?
-Naqty qai ýaqytta habarlanǵany týraly mende aqparattar joq. Ony tek tergeý toby ǵana biledi. Sonymen qatar qalamyzdaǵy eki aýdandaǵy páterlerdi tintý barysynda qylmysqa qatysy bar degen kúdikpen 5 adam ustaldy.
-Ustalǵan azamattar kimder jáne olar qalai anyqtaldy?
-Ókinishke orai bul týraly mende málimetter joq.
-Bul ádeii qoldan jasalǵan aqparat emes pe? Erteń myna halyqty alańǵa shyǵarmaý úshin, úrkitip, qorqytý úshin jasalyp otyrǵan joq pa?
-Bul resmi tirkelgen aqparat. Ádeii burmalap, jalǵan aqparat taratatyndai bizdiń de basymyz ekeý emes qoi. Sondyqtan, turǵyndardan habardyń kelip túskeni de ras, jarylǵysh zattardyń tabylǵany da ras.
Tintý barysynda páterlerden Makarov jáne TT markaly 2 tapansha, RGD-5 tórt granatasy, ańshy myltyǵynyń sholaq túrleri men bes million teńgege jýyq aqsha tabylyp, tárkilendi.
-Tárkilengen aqshalar qandai valiýtalarda boldy? Dollar ma, álde teńge me?
-Jo-joq, teńgelei boldy. Qazir atalǵan oqiǵaǵa qatysty QR Qylmystyq kodeksiniń 287 baby boiynsha qylmystyq is qozǵalyp, sot aldy tergeý amaldary júrgizilýde.
Suhbattasqan Nurgeldi Ábdiǵaniuly
Derekkóz: Abai.kz
