Almaty qalasy máslihaty Nursultan Nazarbaev atyndaǵy dańǵyl men tuńǵysh prezident atyndaǵy saiabaq ataýyn ózgertýdi josparlamaidy, - dep habarlaidy Dalanews.kz.
Bul týraly Máslihattyń "Vlast" suraýyna bergen jaýabynda aitylǵan.
Bul rette Máslihatta kóshelerdi nemese nysandardy qaita ataý týraly máseleni qaraý úshin qoldanystaǵy zańnamada qajet ótinishter sany belgilenbegeni naqtylanǵan.
"Ótken aptada Almaty máslihaty ánshi Ermek Serkebaevtyń, kompozitor Eskendir Hasanǵalievtiń, akterler Iýrii Pomerantsevtiń jáne Vladimir Tolokonnikovtiń qurmetine keibir kóshelerdiń atyn ózgertý josparlanyp otyrǵanyn habarlady. Máslihatta tiisti ótinishter qala turǵyndarynan kelip túskeni aitylǵan", - dep jazylǵan basylym málimetinde.
2022 jylǵy Qańtar oqiǵasynan keiin qoǵam belsendileri Nazarbaev dańǵylyn ózgertip, oǵan Qańtar ataýyn berýdi usyndy. Mundai talap alǵash ret 2022 jylǵy 13 aqpanda Almatyda Qańtar oqiǵasynyń qurbandaryn eske alý aktsiiasynda aityldy.
Aita keteiik, 2017 jylǵy qarashanyń sońynda Almaty qalasy máslihatynyń sessiiasy barysynda depýtattar Almatynyń basty kósheleriniń biri Fýrmanov kóshesin Nazarbaev dańǵyly dep ataýǵa kelisti. Sheshim "megapolis turǵyndarynyń usynystaryn eskere otyryp" qabyldanǵany da aitylǵan edi.
