2025 jylǵy 24 qyrkúiekte Ǵylym ordasynda Iran Islam Respýblikasynyń Bas konsýldyǵy men Mádeni ortalyǵynyń uiymdastyrýymen «Iran kino jáne óneri túni» mádeni is-sharasy ótti.
Sharaǵa «Ǵylym ordasy» RMK bas direktory Ular Muqajanov, Irannyń Almatydaǵy Bas konsýly Sýna Ahmadi, Iran mádeni ortalyǵynyń basshysy Hossein Aǵazade, sondai-aq T. Júrgenov atyndaǵy óner akademiiasynyń, Ulttyq kitaphananyń, Ortalyq mýzeidiń, «Qazaqfilm» kinostýdiiasynyń, Diplomatiialyq klýbtyń, Filosofiia institýtynyń ókilderi, stýdentter men ustazdar qatysty.
Kesh barysynda irandyq rejisserdiń «Aǵash qushaǵynda» filmi kórsetilip, qonaqtar iran qolóneriniń biregei týyndylarymen tanysty. Sondai-aq Ortalyq ǵylymi kitaphananyń sirek kitaptar kórmesi uiymdastyryldy.
«Aǵash qushaǵynda» (Dar Aghooshe Derakht) — otbasy, mahabbat pen adam rýhynyń tózimdiligin shynaiy beineleitin drama. Film Kimiia men Faridtiń on eki jyldyq nekesiniń qiyn kezeńin jáne olardyń sheshiminiń eki balanyń ómirine áserin kórsetedi. Týyndy otbasylyq qundylyqtardyń náziktigi men beriktigin ashyp, kórermenge otbasy birliginiń mańyzy men jaýapkershiliktiń mánin oi eleginen ótkizýge múmkindik beredi.
Film Iran tarapynan 97-shi «Oskar» syilyǵyna usynylyp, halyqaralyq deńgeide moiyndaldy. Sondai-aq Máskeýde ótken «V krýgý semi» festivalinde «Úzdik film» jáne «Úzdik áiel róli» marapattaryn jeńip aldy. Bul drama otbasy qundylyǵyn joǵary baǵalaityn qazaqstandyq kórermen úshin de erekshe áserli ári maǵynaly boldy.
Is-shara Qazaqstan men Iran arasyndaǵy mádeni yntymaqtastyqty nyǵaityp, óner arqyly halyqtar arasyndaǵy rýhani bailanysty arttyrýǵa yqpal etti.
