2025 جىلعى 24 قىركۇيەكتە عىلىم ورداسىندا يران يسلام رەسپۋبليكاسىنىڭ باس كونسۋلدىعى مەن مادەني ورتالىعىنىڭ ۇيىمداستىرۋىمەن «يران كينو جانە ونەرى ءتۇنى» مادەني ءىس-شاراسى ءوتتى.

شاراعا «عىلىم ورداسى» رمك باس ديرەكتورى ۇلار مۇقاجانوۆ، يراننىڭ الماتىداعى باس كونسۋلى سۋنا احمادي، يران مادەني ورتالىعىنىڭ باسشىسى حوسسەين اعازادە، سونداي-اق ت. جۇرگەنوۆ اتىنداعى ونەر اكادەمياسىنىڭ، ۇلتتىق كىتاپحانانىڭ، ورتالىق مۋزەيدىڭ، «قازاقفيلم» كينوستۋدياسىنىڭ، ديپلوماتيالىق كلۋبتىڭ، فيلوسوفيا ينستيتۋتىنىڭ وكىلدەرى، ستۋدەنتتەر مەن ۇستازدار قاتىستى.

كەش بارىسىندا يراندىق رەجيسسەردىڭ «اعاش قۇشاعىندا» ءفيلمى كورسەتىلىپ، قوناقتار يران قولونەرىنىڭ بىرەگەي تۋىندىلارىمەن تانىستى. سونداي-اق ورتالىق عىلىمي كىتاپحانانىڭ سيرەك كىتاپتار كورمەسى ۇيىمداستىرىلدى.

«اعاش قۇشاعىندا» (Dar Aghooshe Derakht) — وتباسى، ماحاببات پەن ادام رۋحىنىڭ توزىمدىلىگىن شىنايى بەينەلەيتىن دراما. فيلم كيميا مەن ءفاريدتىڭ ون ەكى جىلدىق نەكەسىنىڭ قيىن كەزەڭىن جانە ولاردىڭ شەشىمىنىڭ ەكى بالانىڭ ومىرىنە اسەرىن كورسەتەدى. تۋىندى وتباسىلىق قۇندىلىقتاردىڭ نازىكتىگى مەن بەرىكتىگىن اشىپ، كورەرمەنگە وتباسى بىرلىگىنىڭ ماڭىزى مەن جاۋاپكەرشىلىكتىڭ ءمانىن وي ەلەگىنەن وتكىزۋگە مۇمكىندىك بەرەدى.

فيلم يران تاراپىنان 97ء-شى «وسكار» سىيلىعىنا ۇسىنىلىپ، حالىقارالىق دەڭگەيدە مويىندالدى. سونداي-اق ماسكەۋدە وتكەن «ۆ كرۋگۋ سەمي» فەستيۆالىندە «ۇزدىك فيلم» جانە «ۇزدىك ايەل ءرولى» ماراپاتتارىن جەڭىپ الدى. بۇل دراما وتباسى قۇندىلىعىن جوعارى باعالايتىن قازاقستاندىق كورەرمەن ءۇشىن دە ەرەكشە اسەرلى ءارى ماعىنالى بولدى.

ءىس-شارا قازاقستان مەن يران اراسىنداعى مادەني ىنتىماقتاستىقتى نىعايتىپ، ونەر ارقىلى حالىقتار اراسىنداعى رۋحاني بايلانىستى ارتتىرۋعا ىقپال ەتتى.