Almaty qalasynda «Alem City-2» TÚK ornalasqan 5 úiden HÁOT sanatyndaǵy taǵy 105 kezekte turǵan jandarǵa saltanatty túrde páter kilti tabystaldy, dep habarlaidy Dalanews.kz.
Is-sharany osy keshendegi páter kiltin tabystaý rásiminiń jalǵasy deýge bolady. Esterińizge sala keteiik, biyl 25 mamyrda HÁOT sanatyndaǵy birinshi kezekte turǵan 124 adamǵa jańa páterlerdiń kilti tabystaldy, al 28 mamyrda taǵy 164 azamat baspanaly boldy.
«Almaty qalasynyń ákimi Erbolat Dosaevtyń tapsyrmasymen 2024 jyly «Halyqtyń áleýmettik osal toptary» tizimi boiynsha kezekte turǵan azamattarǵa kezek retimen qalanyń kommýnaldyq turǵyn úi qorynan 2000 jalǵa beriletin páter berý josparlanyp otyr, onyń 400-i jetim balalarǵa beriledi.
Osylaisha, HÁOT sanatyndaǵy kezekte turǵan 105 adamǵa páter bylai beriledi:
jetim balalar - 30, 1 jáne 2 toptaǵy múgedek – 8, jeńildik boiynsha UOS-ǵa teńestirilgen ardager – 1, múgedek balalardy tárbielep otyrǵan otbasy – 6, zeinetkerler – 8, tolyq emes otbasy – 52. Barlyq páter keń, taza árleýde beriledi», - dedi Almaty qalasy Kommýnaldyq infraqurylymdy damytý basqarmasy basshysynyń orynbasary Ǵalymjan Ábdishúkiruly.
Almatyda mundai jobalardy iske asyrý qala turǵyndarynyń, ásirese qiyn ómirlik jaǵdaiǵa tap bolǵandardyń ómir súrý sapasyn jaqsartýǵa baǵyttalǵan. Qala biligi azamattardyń áleýmettik osal sanatyna qajetti qoldaýdy qamtamasyz ete otyryp, turǵyn úi máselesin sheshý boiynsha belsendi jumysyn jalǵastyryp otyr. Jańa páter ieleri baspananyń tamasha syilyq bolǵanyn, onyń jańa múmkindikterge ashatynyn atap ótti.
«Uialy telefonyma qońyraý shalyp, páterdiń iesi bolǵanymyzdy aitty, basynda senbedim. Biz úshin bul úlken baqyt jáne tosyn syi! Ulymdy jalǵyz asyrap otyrǵan men úshin bul memleket tarapynan úlken qoldaý. 2015 jyly kezekke turǵan edim», - dedi almatylyq Viktoriia Grishina.
