Almatyda elimizdegi bıznes sýbektileriniń bsym bóligi – 116 myńnan astamy tirkelgen jáne jumys jasaýda. Búginde SHOB qyzmpetkerleriniń 88,8%-y MÁMS júıesindegi derekterin ózektendirdi. Málimetter bazasynda kásipkerlik sýbektilerin naqtylaý boıynsha jumys 2021 jyldyń úshinshi toqsanynyń sońyna deıin jalǵasady.
Joǵary oqý oryndary men kolejderdiń 15 jeńildik sanatyna enetini stýdentterin mindetti áleýmettik medısınalyq saqtandyrýmen qamtý máselesine erekshe nazar aýdaryldy ári olardyń jarnalaryn memleket tóleıdi. Medısınalyq saqtandyrý qory Almaty fılıalynyń dırektory Tileýhan Ábildaevtyń aıtýynsha, jeńildik sanatyna orta, tehnıkalyq jáne kásiptik, orta bilimnen keıingi, joǵary bilim berý uıymdarynda, sondaı-aq joǵary oqý ornynan keıingi bilim berý uıymdarynda kúndizgi bólimde oqıtyndar úmitker bola alady.
– Qor jeńildik sanattarynyń tizimderin jasamaıtynyn túsingen jón. 15 jeńildik sanatyndaǵy ókilderdiń tizimderin qorǵa ýákiletti organdar aqparattyq júıeler arqyly jiberedi. Sodan keıin olar jeńildik berý kezeńinde avtomatty túrde saqtandyrylady, – dedi dırektor.
Bolashaqta medısınalyq kómek alý kezinde problemalarǵa tap bolmaý úshin stýdentter MÁMS júıesindegi mártebesin Qoldau 24/7 qosymshasy, Saqtandyry jedelhat boty jáne fms.kz saıty arqyly tekserýleri tıis. Saqtandyrý mártebesi bolmaǵan jaǵdaıda, stýdentter UBBB (Ulttyq bilim berý bazasy) aqparattyq júıesine málimetterdi engizý úshin ózderiniń oqý oryndaryna júginýleri kerek. Sodan soń olar kúndizgi oqýdyń barlyq kezeńinde saqtandyrylady. Eger stýdentter saqtandyrylmaǵan ári shuǵyl medısınalyq qyzmetke muqtaj bolsa, onda olar oqıtyn jerinen anyqtamany qosa otyryp, 24/7 Qoldau qosymshasy arqyly ótinish jiberýi kerek. Mundaı jaǵdaılarda qor ýaqytsha saqtandyrý mártebesin bir aıǵa saqtandyra alady.
Keńeste qalalyq qoǵamdyq densaýlyq, bilim, áleýmettik damý, kásipkerlik jáne ınvestısıalar basqarmalarynyń jáne aýdandar ákimdikteriniń basshylary tyńdaldy. Kezdesýge qatysýshylar atalǵan stýdentterdiń ulttyq deńgeıdegi ıntegrasıasy jáne olardyń MÁMS málimetter bazasyndaǵy mártebesi týraly usynystaryn aıtty.
Kezdesýdi qorytyndylaı kele, MÁMS máseleleri jónindegi aımaqtyq shtabtyń tóraǵasy, Almaty qalasy ákiminiń orynbasary Erjan Babaqumarov álemde bolyp jatqan pandemıa men jańa mýtasıalanǵan shtamdardyń aınalymy aıasynda halyqty MÁMS júıesimen qamtý densaýlyq saqtaý júıesiniń strategıalyq mańyzdy faktory ekenin atap ótti. Sondyqtan aýdan ákimdikterine qosymsha sharalar qabyldaý úshin birqatar naqty tapsyrmalar berildi. Qoǵamdyq densaýlyq saqtaý basqarmasy turǵyndarmen, ásirese AMSK pýnktterinde azamattardy emhanalarǵa taǵaıyndaý boıynsha túsindirý jumystaryn kúsheıtýi kerek. Sondaı-aq, joǵary oqý oryndary men kolejderdiń basshylaryna óz stýdentteri týraly derekterdi UBBB júıesinde tekserýdi usyndy.
Medısınalyq saqtandyrý qorynyń tóraǵasy Bolat Tókejanov atap ótkendeı, búkil el boıynsha aımaqtyq shtabtar aýqymdy jumystardy atqarýda.
– Halyqty mindetti medısınalyq saqtandyrý júıesimen qamtý jumystary jalǵasýda. 2021 jyldyń 1 sáýirindegi jaǵdaı boıynsha el turǵyndarynyń 84,4%-y saqtandyrylǵan. Biraq 2,9 mıllıon adam mindetti áleýmettik medısınalyq saqtandyrý júıesinen tys qalýda. Olardyń barlyǵynyń medısınalyq qyzmetterge qoljetkizýleri óte mańyzdy, – dep atap ótti Bolat Tókejanov.
