Almatyda úsh jigit er adamdy aiaýsyz soqqyǵa jyqqan. Oqiǵa týraly áleýmettik jelide jábirlenýshiniń uly málimdedi, dep habarlaidy Dalanews.kz.
Onyń aitýynsha, 10 aqpan kúni úsh adam ákesin sóilesýge syrtqa shaqyryp, keiin jabylyp urǵan. Shabýyl jasaǵandardyń biri kútpegen jerden qatty soqqy jasap, saldarynan er adam shamamen bir saǵat boiy es-tússiz jatqan. Dárigerler oǵan bas súieginiń birneshe jerden synýy jáne miǵa qan quiylý diagnozyn qoiǵan.
Ulynyń sózinshe, qazir otbasynyń jaǵdaiy aýyr. Jaldamaly páterde turady, qaryzdary bar, anasy zeinetker, jubaiynyń densaýlyǵy syr bergen, otbasynda kámeletke tolmaǵan eki bala tárbielenip jatyr.
Almaty qalalyq politsiia departamenti kúdiktiniń jeke basy anyqtalyp, ustalyp, ýaqytsha ustaý izoliatoryna qamalǵanyn málimdedi. Qazir tergeý amaldary júrgizilip jatyr, istiń barysy politsiia basshylyǵynyń baqylaýynda.
