Almatyda Elina esimdi qyz zorlyqtyń qurbany bolǵanyn aitqan edi. Onyń sózinshe, barda kokteil bergen tanysy keiin úiine aparyp zorlaǵan. Osy iske qatysty sot úkimi shyqty, - dep habarlaidy Dalanews.kz.
Almaty qalasy Medeý aýdanynyń №2 aýdandyq sotynda qyz zorlady dep aiyptalǵan 34 jastaǵy K.-ǵa qatysty qylmystyq is jabyq rejimde qaraldy.
Sot málimetinshe, byltyr 9 naýryzǵa qaraǵan túni K. qalanyń túngi klýbtarynyń birinde demalyp júrip, sol ýaqytta óziniń qurbylarymen júrgen tanysy O-men kezdesken. Keiin K. ony úiine shyǵaryp salamyn degen syltaýmen óz páterine ákelgen.
"Odan soń jábirlenýshiniń dármensiz kúiin, iaǵni ishimdikke mas bolǵanyn paidalanyp, zorlyq-zombylyq kórsetip, jábirlenýshiniń erkinen tys jynystyq qatynas jasaǵan. Osylaisha sottalýshy zorlaý isin júzege asyrǵan", - dep jazylǵan málimette.
Sottalýshy kinásin moiyndamady jáne sottan ózin aqtaýdy, bas bostandyǵynan aiyrmaýdy surady. Prokýror sottalýshyny kináli dep tanýdy jáne 5 jyl 4 aiǵa bas bostandyǵynan aiyrýdy surady.
Sottalýshynyń kinási is boiynsha jinalǵan saraptamalardyń qorytyndylary, jábirlenýshi men kýágerlerdiń aiǵaqtary arqyly dáleldendi.
Sot úkimimen ol Qylmystyq kodekstiń 120-baby 1-bólimi boiynsha kináli dep tanyldy jáne oǵan 5 jylǵa bas bostandyǵynan aiyrý túrindegi jaza taǵaiyndaldy, sottalýshy jazasyn qaýipsizdigi ortasha qylmystyq-atqarý júiesi mekemesinde óteidi.
Úkim zańdy kúshine engen joq.
