Qorǵanys ministrligi áleýmettik jelilerde taraǵan videoda ózin vedomstvo qyzmetkeri retinde tanystyrǵan er adamnyń Qarýly kúshterge qatysy joq ekenin málimdedi. Oqiǵa 21 qańtar kúni Almaty qalasynda tirkelgen, dep habarlaidy Dalanews.kz.
Vedomstvonyń habarlaýynsha, tekserýge Threads áleýmettik jelisindegi qoldanýshynyń jazbasy negiz bolǵan. Avtordyń aitýynsha, "Moskva" saýda ortalyǵynyń mańynda ózine jáne dosyna "Qazaqstan Respýblikasynyń Qorǵanys ministrligi" degen jazýy bar beidjik taqqan belgisiz er adam jaqyndaǵan. Ol amandaspai, ózin tanystyrmai-aq, birden tirkeý orny týraly suraq qoiǵan.
Jazba avtory beitanys adamnan: "Siz kimsiz?" dep suraǵanymen, ol naqty jaýap bermei, olardyń izdeýde bolýy múmkin ekenin nemese AÁO men Ýkrainaǵa qatysy baryn aitqan. Sonymen qatar ózin áskeri komissariat qyzmetkerimin dep tanystyrǵan.
Jastar bolǵan jaǵdaidy telefonǵa túsire bastaǵanda, er adam olardyń qurylǵysyn tartyp alýǵa árekettengen. Osydan keiin olar jaqyn mańdaǵy kafege kirip, politsiia shaqyrǵan.
"Qorǵanys ministrligi ýákiletti organdarmen birlesip, oqiǵanyń barlyq mán-jaiyn tekserip jatyr. Tekserý nátijesi boiynsha materialdar zańda kózdelgen sharalardy qabyldaý úshin ishki ister organdaryna joldanady", – delingen resmi habarlamada.
