Almatyda avtobýstardyń birinde jolaýshylar arasynda janjal shyqty. Jábirlenýshiniń aitýynsha, orys tildi áiel oǵan qazaq tilinde sóilegeni úshin aiqailap, balaǵattap, qorqytqan. Isti baqylaýǵa alǵan zańger Meiirman Shekeev quqyq buzýshynyń ústinen is qozǵalǵanyn málimdedi, dep habarlaidy Dalanews.kz.
“Birneshe kún buryn avtobýsta bir áiel aiqailap sóiledi. Men oǵan jai sóilesýin ótingende, ol aiqailap balaǵattap, qorqytyp, telefonǵa videoǵa túsire bastady. Sol kezde men de jaǵdaidy telefonǵa túsirdim”, - deidi ol.
Dórekilik tanytqan áiel orys tilinde sóilep, jábirlenýshini qorqytyp, ar-namysyna tietin sózder qoldanǵan.
“Keiin ol maǵan “govori po‑rýsski” dep aiqailai bastady. Nege men óz elimde qazaqsha sóilei almaimyn? Qazaqsha sóilesem, oryssha sóileýimdi talap etti”, - dedi jábirlenýshi.
Oqiǵany baqylaýǵa alǵan zańger Meiirman Shekeev jábirlenýshiniń aryzyna sáikes áreket jasalǵanyn aitty.
“Qazirgi tańda jábirlenýshi bizge kómekke júgindi, biz tiisti aryzymyzdy politsiiaǵa joldadyq. Sizderdiń qoldaýlaryńyz óte mańyzdy. Sebebi mundai oqiǵalar kóbine “jabýly qazan” kúiinde qalyp jatady. Qazaqstanda qazaq tili memlekettik til, árbir azamat óz tilinde sóileýge quqyly. Bul oqiǵa sabaq bolý úshin biz isti sońyna deiin jetkizemiz”, - dep málimdedi ol.
Araǵa uzaq ýaqyt salmai zańger jaqsy jańalyǵyn jetkizdi.
“Keshegi beinejazbaǵa sizderdiń qoldaýlaryńyz arqasynda Almaty qalasy, Alataý aýdandyq politsiia basqarmasy jedel áreket etip, quqyq buzýshyny anyqtady. Quqyq buzýshynyń ústinen is qozǵalyp, erteń sotqa jiberiledi. Qoldaýlaryńyzǵa myń da bir alǵys!”, - dedi zańger.
Al dórekilik tanytqan áiel óz kinásin moiyndap, qazaq halqynan keshirim surady.
“Men óz kinámdi moiyndaimyn. 12 jeltoqsan kúni 81‑avtobýsta bolǵan janjal úshin keshirim suraimyn. Budan bylai osyndai áreket qaitalanbaidy. Kelesi joly sózderim men áreketterime abai bolamyn”, - dep málimdedi ol.
