Almatyda qaraly qaýym Halyq qaharmany, batyr ǵaryshker Talǵat Musabaevty aqtyq saparǵa shyǵaryp salý úshin Ofitserler úiine jinaldy. Ataqty ushqysh-ǵaryshker 4 tamyzda 75 jasyna qaraǵan shaǵynda ómirden ozdy, dep habarlaidy Dalanews.kz Zakon.kz-ǵa silteme jasap.
Búgin, tańerteń Qazaqstannyń Halyq qaharmanyn sońǵy saparǵa shyǵaryp salý úshin 28 gvardiiashy-panfilovshylar atyndaǵy saiabaqqa batyrdyń týystary, áriptesteri, ziialy qaýym ókilderi men belgili tulǵalar jinaldy.
Qaraly jiynǵa reseilik ǵaryshker Sergei Krikalev te arnaiy keldi. Ol Talǵat Musabaevpen birge jumys isteý baqytyna ie bolǵanyn aityp, onyń jumystaǵy jáne ómirdegi jaqsy qyrlaryna toqtaldy.
Sondai-aq marqumnyń áriptesterimen birge belgili ǵaryshkerler Toqtar Áýbákirov pen Aidyn Aiymbetov te qoshtasý rásimine qatysty.
Ofitserler saraiynyń foiesinde qurmetti qaraýyl qoiyldy.
Qaraly qaýym ishinen birqatar depýtattardyń qarasy da baiqalady. Olardyń arasynda máslihat tóraǵasy Meiirjan Otynshiev, Májilis depýtaty Azat Perýashev, ǵalym Rahman Alshanov, zapastaǵy general-leitenant Beksultan Sársekov te bar. Ǵaryshtan keiin Talǵat Musabaev zań shyǵarý salasymen de ainalysqany belgili. Ol Senat depýtaty, qoǵam qairatkeri bola otyryp, kóptegen igi bastamalarǵa bastamashylyq etken.
Qaraly qaýymǵa jinalǵan igi-jaqsylar kezek-kezek sóz alyp, óz qyzmetin otandyq ǵarysh salasyn damytýǵa arnaǵan biregei batyrdyń eren eńbegi men óshpes erligin basa atap ótti.
Budan keiin 28 panfilovshy-gvardiiashylar atyndaǵy saiabaqta aza tutý mitingisi ótetini belgili. Marqum Kensai ziratyna jerlenedi.
Aita ketsek, Talǵat Musabaev 1951 jyly 7 qańtarda Fabrichnoe aýylynda (Almaty oblysy, Jambyl aýdany) dúniege kelgen. Ol Qazaqstannyń Halyq Batyry, Qazaqstan Respýblikasy aviatsiiasynyń general-leitenanty, tehnika ǵylymdarynyń doktory bolyp tabylady. Talǵat Musabaev ǵaryshqa 1994, 1998 jáne 2001 jyldary úsh ret ushqan. Sondai-aq ol QR Ulttyq ǵarysh agenttiginiń tóraǵasy (2007-2016 ) boldy. 2017 jyldan 2023 jylǵa deiin Musabaev Qazaqstan Respýblikasy Parlamenti Senatynyń depýtaty boldy.
Kúni keshe Memleket basshysy Qasym-Jomart Toqaev ataqty ushqysh-ǵaryshker, Halyq qaharmany, memleket jáne qoǵam qairatkeri Talǵat Musabaevtyń qaitys bolýyna bailanysty kóńil aitty. Sonymen qatar, "Roskosmos" Talǵat Musabaevtyń qazasyna bailanysty kóńil bildirdi.
