Almatyda qyrkúıekte ótken Be Woman forýmy kópshiliktiń narazylyǵyn týdyrdy. Buǵan sebep - reseılik psıholog Alekseı Sıtnıkovtiń Reseı prezıdenti Vladımır Pýtındi maqtaýy, dep habarlaıdy Dalanews.kz.
Ol Pýtınniń "qaıratty tulǵanyń" úlgisi ekenin aıtqan.
"Pýtınniń qandaı qıyndyqqa qarsy turyp otyrǵanyn qarańyzdar. 55 memleketpen qaqtyǵysyp jatsa da, ol áli de jeńiske jetip keledi. Tramp Pýtındi ushaq trapynda qalaı qarsy alǵanyn kórdińizder me? Bulaı eshbir lıderdi qarsy alǵan emes. Bul tulǵanyń pasıonarlyǵy keıde tutas ulttyń pasıonarlyǵynan da basym túsip, álemdi ózgertýge qýatty qozǵaýshy kúsh bola alatynyn kórsetedi", – dedi ol.
Aıta keteıik, qoǵamda reseılik spıkerdiń bul málimdemesi qyzý talqylanyp jatyr. Bul pikir úshin forýmdy uıymdastyrýshylardy da synaǵandar tabylǵan.
Be Woman Asia 2025 forýmy 26 qyrkúıekte Almatydaǵy Respýblıka saraıynda ótken bolatyn. İs-sharanyń negizin qalaýshy - olıgarh Sergeı Kannyń jubaıy Janna Kan.
