Mektepte terakt jasalǵany týraly jalǵan habar bergen jasóspirim anyqtaldy, dep habarlaıdy Dala News.
5 naýryz kúni saǵat 16:48-de «102» jelisine belgisiz adam qońyraý shalyp, mektepte terorıstik shabýyl jasalǵany týraly habarlaǵan.
Oqıǵa ornyna polısıa, qutqarý jáne jedel qyzmetter dereý jiberilgen. Alaıda ǵımarat pen onyń aýmaǵyn tekserý barysynda aqparat rastalmaǵan.
Saǵat 16:52-de sol nómirden qaıta qońyraý túsip, habarlaǵan adam muny qaljyń retinde jasaǵanyn aıtqan.
Tekserý barysynda nómir ıesi Almaty qalasynyń Alataý aýdanynda turatyn kámeletke tolmaǵan jasóspirim ekeni anyqtaldy. Ol anasynyń qatysýymen suraý kezinde sabaqtan keıin polısıaǵa ózi qońyraý shalǵanyn moıyndaǵan.
Atalǵan fakti boıynsha jasóspirimniń zańdy ókiline qatysty balany tárbıeleý mindetterin tıisinshe oryndamaǵany úshin ÁQBtK-niń 127-baby 1-bóligi boıynsha ákimshilik hattama toltyryldy.
Oqıǵa tirkelip, tıisti sharalar qabyldandy.
