Almaty qalasynyń Naýryzbai aýdandyq politsiia basqarmasynyń jedel ýákilderi ustalǵandardan moiyndatý jaýabyn alý úshin elektroshoker, judyryq jáne sý quiylǵan bótelke qoldanǵan. Keiin ózderi qylmystyq jaýapkershilikke tartylyp, bas bostandyǵynan aiyrylǵan, dep habarlaidy Dalanews.kz
Jýrnalist Mihail Kozachkov málimetinshe,Almatynyń mamandandyrylǵan aýdanaralyq qylmystyq ister sotynda 32 jastaǵy politsiia kapitany Ábilhaiyr Pernebekov pen 27 jastaǵy leitenant Bibatyr Álimbekovke qatysty úkim shyqqan. Olarǵa azaptaý jáne qyzmettik ókilettigin asyra paidalaný aiyptary taǵylǵan.
Is materialdaryna sáikes, ótken jyldyń naýryz aiynda Naýryzbai aýdandyq politsiia basqarmasyna jergilikti turǵyn shaǵymdanǵan. Onyń aitýynsha, belgisiz adamdar jalǵan qujattar arqyly jer telimin óz atyna rásimdep, keiin satýǵa árekettengen. Bul isti tekserý Pernebekov pen Álimbekovke júktelgen.
Politseiler kúdiktilerdiń birin anyqtaǵanymen, resmi shaqyrtý jibermei, jer telimin satyp alýshy retinde habarlasqan. Keiin notariýs keńsesinde kezdesýge kelisken. Sol jerge eki qyzmetker taǵy bes áriptesin ertip barǵan.
Nátijesinde úsh adam ustalyp, politsiia basqarmasyna jetkizilgen. Tergeý nusqasy boiynsha, ǵimarattaǵy beinebaqylaý kameralary kórmeitin aýmaqta ustalǵandardyń birine qysym jasalǵan. Odan aqsha salynǵan sómke tárkilenip, smartfonynyń qupiiasózin aitý talap etilgen.
Er adam telefondy ashýdan bas tartqan soń, ony soqqyǵa jyqqan. Keiin ájethanaǵa aparyp, taǵy da uryp-soqqan. Budan soń kabinetke qaita ákelinip, elektroshokermen eki ret toq soqtyrylǵany aityldy. Sondai-aq jaýap bermegen kezde basynan uialy telefonnyń qyrymen urǵan.
Tergeý dereginshe, osy iske qatysy bolýy múmkin taǵy bir adam da politsiia basqarmasyna jetkizilip, dál osyndai tásilmen azaptalǵan. Oǵan qolmen soqqy jasalyp, elektroshoker jáne sý toltyrylǵan plastik bótelke qoldanylǵan. Osylaisha moiyndatý jaýaby alynǵan.
Alaida keiin jedel ýákilderdiń ózderi qamaýǵa alynǵan. Olardyń áreketi azaptaý jáne kúsh qoldaný arqyly bilikti asyra paidalaný retinde saralanǵan.
Is alqabilerdiń qatysýymen qaralǵan. Olar eki aiyptalýshynyń kinási tolyq dáleldendi degen qorytyndyǵa kelgen. Sýdia Baqythan Bakirbaev politseilerdi azaptaý baby boiynsha kináli dep tanyp, bilikti asyra paidalaný aiybyn artyq dep eseptep, alyp tastaǵan.
Sot úkimimen burynǵy politseilerdiń árqaisysy 4 jyl 6 ai merzimge bas bostandyǵynan aiyryldy. Úkim ázirge zańdy kúshine engen joq.
