19–30 qyrkúiek aralyǵynda Almaty qalasynda shahmattan kadetter arasyndaǵy álem chempionaty ótedi, dep habarlaidy Dalanews.kz.
Ótken jyly Italiianyń Montesilvano qalasynda ótken Álem chempionatyna 77 elden 700-den astam jas shahmatshy qatysty. Biylǵy chempionatta qatysýshylar sany artyp, 88 elden 851 oiynshy, sonyń ishinde 231 qazaqstandyq tirkeldi.
Chempionat Balýan Sholaq atyndaǵy sport jáne mádeniet saraiynyń bas arenasynda ótedi. Buǵan deiin bul jerde 2022 jyly rapid pen blitsten álem chempionaty jáne 2024 jyly jasóspirimder arasyndaǵy Aziia birinshiligi ótken bolatyn.
Foto: Dalanews.kz
Kóptegen bala úshin shetel asyp, halyqaralyq jarystarǵa barý qarjylai da, uiymdastyrýshylyq turǵydan da ońai emes. Sondyqtan Almatyda ótetin doda – 200-den astam qazaqstandyq jasóspirimge ózin kórsetýge, álemniń úzdikterimen oinap, tájiribe jinaýǵa jáne reitingin kóterýge taptyrmas múmkindik.
Qazaqstan shahmat federatsiiasynyń prezidenti Timýr Týrlov Almatyda ótip jatqan kadetter arasyndaǵy FIDE chempionatynyń ashylýynda sóz sóilep, jarystyń mańyzdylyǵyn atap ótti.
"Búgin kadetter arasyndaǵy FIDE chempionatynyń ashylý rásimi ótip jatyr. Bul – jas shahmatshylardyń álem chempiony ataǵy úshin baq synaityn álemdik deńgeidegi basty jarystardyń biri. Negizgi básekelestik kásibi deńgeige jas kezden bastalatynyn eskersek, munyń máni zor. Biz qazir Almatyǵa 88 elden kelgen qonaqtardy qarsy alyp otyrmyz. 800-den astam jas shahmatshy qatysady. Bul – bizdiń elde alǵash ret ótip otyrǵan aýqymdy jarys. Qatysýshylardyń sany da, sapasy da óte joǵary", – dedi Týrlov.
Onyń aitýynsha, buǵan deiin qazaqstandyq jas shahmatshylar halyqaralyq týrnirlerge shetelge shyǵyp qatysyp kelgen. Al biylǵy chempionat elimizdiń ózinde uiymdastyrylyp otyrǵandyqtan, bul – kóptegen jas oiynshy úshin tájiribe jinap, álemniń úzdikterimen oinaýǵa biregei múmkindik.
"Bizde ulttyq deńgeide úlken quram bar. Qazaqstannan birneshe komanda qatysady. Bul kóptegen jasóspirimderimiz úshin álemniń eń myqty shahmatshylarymen bir ústelde oinap kórýge jol ashady. Mundai múmkindik sirek beriledi", – dedi federatsiia basshysy.
Týrnirge Halyqaralyq shahmat federatsiiasynyń (FIDE) prezidenti arnaiy keldi. Jarysqa el astanasy men Úkimet tarapynan da úlken qoldaý kórsetilgen.
"Bul chempionattyń elimizde ótýi – biz úshin úlken mártebe. Oǵan qala ákimi de, vitse-premer de airyqsha nazar aýdaryp otyr. Chempionat dál osyndai qolaily mezgilde ótip, keń qoldaý taýyp otyr", – dedi Timýr Týrlov.
Qatysýshylar
Qazaqstan quramasy da myqty oiynshylardy tirkedi. Olardyń qatarynda:
-
Ádinur Ádilbek (1837) pen Alisha Bisalieva (1744) – 8 jasqa deiingi toptaǵy favoritter;
-
Alanna Berikqyzy (2162) – G12 sanatynda reiting kóshbasshysy;
-
Ámirjan Ánetov (2081) pen Rizat Ulan (2062) – O10 sanatyndaǵy basty úmitkerler;
-
Jansaia Sholpanbek (2084) – G12 sanatynda úzdik atanyp otyr;
-
Symbat Jetpis (1761) pen Milana Filippova (1755) – G10 sanatyndaǵy favoritter;
-
Danis Qýandyquly (2211), 2023 jylǵy álem chempiony (O10), jáne Nuraly Bolashaqov (2209) – O12 sanatyndaǵy basty básekelester.
Ashylý rásiminen keiin birden 1-shi týr bastaldy. Jalpy 19–30 qyrkúiek aralyǵynda shveitsar júiesi boiynsha 11 týr ótedi. Ýaqytty baqylaý – 90+30 formaty (ár partiiaǵa 90 minýt jáne alǵashqy júristen bastap ár qadamǵa 30 sekýnd qosylady).
Qazaqstandyq sportshylardyń buǵan deiingi jetistigi
Qazaqstandyq shahmatshylardyń sońǵy jyldardaǵy jetistikteri zor. 2024 jyly Italiianyń Montesilvano qalasynda ótken álem chempionatynda Alanna Berikqyzy (G10) men Mark Smirnov (O12) altynnan alqa taqty, al Hanzada Amanjol (G12) kúmis júldege qol jetkizdi. El quramasy jalpy esepte 2 altyn jáne 1 kúmis medalmen birinshi orynǵa shyqty (Qytai – 2 altyn, 1 qola).
2025 jyl da tabysty bastaldy. Naýryzda Serbiiada ótken mektep oqýshylary arasyndaǵy álem chempionatynda Abdýl-Málik Qairat, Alisha Bisalieva jáne Álimjan Jaýynbai chempion atansa, Nurislam Sultanhan kúmis júldeger boldy. Shildede Batýmide ótken Álem kýbogynda Alisha Bisalieva men Ádinur Ádilbek (ekeýi de U8) altyn jáne qola medal jeńip aldy. Al tamyz aiynda Danis Qýandyquly Kolýmbiiadaǵy jasóspirimder shahmat olimpiadasynda qola júlde ielendi. Buǵan qosa, AQSh-ta ótken mektep komandalary arasyndaǵy álem chempionatynda Danis Qýandyquly, Ahmediiar Súgiraliev, Amanbek Ótetileý jáne Nursaia Jumabek el namysyn qorǵady.
