Almatyda júzdegen talapkerdi oqýǵa qabyldamaǵan politsiia akademiiasynda shý shyqty. Úmitteri aqtalmaǵan túlekterdiń ata-anasy endi iske Ishki ister ministrliginiń aralasyp, oqý ornyna tekseris júrgizýin suraidy, dep habarlaidy Dalanews.kz Informbiýro baǵdarlamasyna siltep.
"Munyń shekti baly - 50. Bizge 50+ bolsyn degen, balam 75 ball aldy. Biz ótip turmyz, biraq balamnyń saǵyn syndyryp tur. Eshqandai sebep joq. 52, 56 balmen túsip ketkender bar. Mende kimniń qansha teńge berip, kimge qalai usynǵanynyń videosy bar", - dedi ata-ana Janar Myrqasymova.
"Naǵyz politsiia bolatyn adamdardy qabyldamaidy. Myna jerde qanshama sport sheberiniń kandidaty bar, solardyń eshqaisy ótken joq. Óz erkimmen oqýdan bas tartamyn degen qaǵazǵa qol qoidyryp alǵan. Qysym kórsetken balaǵa", - dedi taǵy bir ata-ana Ashat Sháripov.
Akademiia basshylyǵynyń málimdeýinshe, bul oqý orny politseilerdi tek memlekettik grantpen oqytady. Aqyly negizde joq. Biyl 300 oryn bólingen, al oǵan 700 talapker úmitker boldy deidi. Al tómen balmen túskender, sózge sensek, buiryqqa sai jeńildikterin qoldanypty.
"Ádil ótkenine 100 paiyz kepildik bere alamyz. Adam kóp bolǵannan keiin ótetin baldyń kórsetkishi biyl joǵary boldy. Sondyqtan keibir mamandyqtar boiynsha tipti 70-ten asa ball alǵan balalar, ókinishke qarai, mandattyq komissiiadan óte almady", - dedi QR IIM Maqan Esbolatov atyndaǵy Almaty akademiiasy bastyǵynyń orynbasary Erjan Bimoldanov.
Almatydaǵy politsiia akademiiasynyń ókilderi oqýǵa qabyldaý jumysy tolyq aiaqtalǵanyn málimdeidi. Al oqýǵa túse almaǵan 100 shaqty talapkerdiń ata-anasy Ishki ister ministrligine tikelei hat joldap, shaǵymdanyp otyr.
