Polısıa departamenti Tergeý basqarmasynyń málimetinshe, kúdiktilerdi polısıa bólimshesiniń jedel ýákilderi anyqtaǵan.
Ustalǵandar – 1990 jylǵy jáne 1987 jylǵy er adamdar. 1990 jylǵy er adamnyń osyǵan deıin qaraqshylyq úshin sotty bolǵany aıtylady. Olar áleýmettik jeliler men messendjerlerde halyqty adam kóp júretin jerde jınalyp, quqyqqa qaıshy áreketter jasaýǵa shaqyrǵan.
«Olar QR Qylmystyq kodeksiniń 272-babynyń 3-bóligi boıynsha jazalandy. Sotqa deıingi tergeý bastaldy. Qajet saraptamalar taǵaıyndaldy. Polısıa departamenti senimsiz derekkózderden taraǵan aqparatqa senbeı, arandatýǵa ermeýge shaqyrady», - delingen polısıa departamentiniń habarlamasynda.
