Almatyda aýqymdy qurylys jáne jol jóndeý jumystary áli de jalǵasyp jatyr. Soǵan orai jol jumystarynyń sapasyna baqylaý kúsheidi, dep habarlaidy Dalanews.kz.
Politsiia jumystardyń sapasy men oryndalý merzimine baqylaýdy kúsheitip, zańbuzýshylyqtar úshin laýazymdy tulǵalardy jaýapkershilikke tartyp jatyr.
Resmi málimet boiynsha jyl aiaǵyna deiin qaladaǵy túrli shaǵynaýdanda 120 shaqyrymnan asa jol, trotýar, velojol salynyp, jóndeýden ótedi. Sondai-aq, aialdama keshenderi men jerústi ótkelderi ornatylady.
Politsiia biyl segiz aida joldarǵa 2 myńnan asa tekseris júrgizilip, laýazymdy jáne zańdy tulǵalarǵa jalpy somasy 5,5 million teńgege 140 ákimshilik hattama toltyrǵan. 2 myńnan asa quqyqbuzýshylyqty joiý týraly nusqaý berilgen. Jol jamylǵysy men infraqurylymda 4 myńǵa jýyq aqaý anyqtalǵan.
"Joldardy salý men kútip ustaý kezinde zańbuzýshylyqtarǵa jol bergen merdiger uiymdar men laýazymdy tulǵalar ákimshilik jaýapkershilikke tartylyp jatyr", – dedi Almaty qalasy PD Ákimshilik politsiia basqarmasy bastyǵynyń orynbasary Darhan Qylyshbaev.
Jol aktivteri sapasynyń ulttyq ortalyǵy Almaty qalalyq filialynyń bólim basshysy Aidar Beispekovtiń aitýynsha, mekeme jyl basynan beri qala kóshelerine 386 márte tekseriske shyqqan. 126 olqylyq anyqtalǵan.
Jol jabyny men jol qurylysy materialdarynan 825 synama alynǵan. Olardyń 305-i talapqa sai bolmaǵan. Qalalyq qurylysty sáýlet-qurylys baqylaý basqarmasyna óreskel olqylyqtar týraly 7 márte hat jazylǵan.
