Brifing barysynda Almaty ákiminiń orynbasary Almashan Smatlaev turǵyndardyń qoǵamdyq kólikke qatysty narazylyǵynan habardar ekenin málimdedi, dep habarlaidy Dalanews.kz.
Onyń aitýynsha, bul máseleni sheshý baǵytynda tiisti jumystar júrgizilip jatyr.
"Birinshiden, úsh jańa avtobýs parkin salyp jatyrmyz. Ekinshiden, buǵan deiin qalada qoǵamdyq kólikke arnalǵan jeke janarmai quiý beketteri bolmaǵan, barlyq avtobýs bir ǵana stantsiiada janarmai quiatyn. Endi avtoparkterdiń janynan sondai beketter salynady. Jyl sońyna deiin bul jumystar aiaqtalady", - dedi ol.
Sonymen qatar, Almashan Smatlaev jedel qozǵalys ortalyǵy ashylǵanyn atap ótti. Onda 412 maman qoǵamdyq kólik baǵyttarynyń jumysyn baqylap otyr.
"Qalada 3500 avtobýs jáne 3800 júrgizýshi bar. Ortalyq mamandary kún saiyn ár baǵytty tekseredi. Qazir ár baǵyttaǵy júktemeni eseptep jatyrmyz. Bul bir kúnde sheshiletin másele emes. Bizdiń derekke sáikes jolaýshylardyń 49 paiyzy jol aqysyn tólemeidi. Árine, óz jumysyna salǵyrt qaraityn júrgizýshiler de bar. Alaida biz jolaýshylardy da jol aqysyn tóleýge shaqyramyz. Aldaǵy jarty jyl ishinde naqty esepteýler júrgizilip, qai baǵyttarǵa qosymsha avtobýs qajet ekeni jáne qaisyn jańartý kerek ekeni aiqyndalady", - dedi ákim orynbasary.
