Megapolistiń turaqty damýy men ekologiialyq tepe-teńdikti saqtaý maqsatynda 2025 jyly Almatyda ósimdikterdi maýsymdyq óńdeý baǵdarlamasy bastaldy. Bul baǵdarlama aiasynda jasyl jelekterdi biologiialyq qorǵaý quraldary paidalanylady,– dep habarlaidy Dalanews.kz
Qaladaǵy aǵashtar men butalarǵa kútim jasaýdyń jańa strategiiasy zamanaýi biofýngitsidterdi, bioakaritsidter men bakteriialyq preparattardy, sondai-aq, mikrotyńaitqyshtardy qoldanýdy kózdeidi. Mundai tásil qorshaǵan ortaǵa túsetin himiialyq júktemeni azaityp, tabiǵi bioártúrlilikti saqtaýǵa múmkindik beredi.
«Biz dástúrli jáne biologiialyq ádisterdiń teńgerimdi úilesimine basa nazar aýdaramyz. Bul ósimdikterdi ziiankester men aýrýlardan tiimdi qorǵaýǵa kómektesedi jáne ekojúie men qala turǵyndarynyń densaýlyǵyna tónetin qaýipterdi azaitady», – dep atap ótti qalalyq ekologiia jáne qorshaǵan orta basqarmasy.
Esterińizge sala keteiik, 20 sáýirden bastap Almatyda ósimdikterdi biologiialyq óńdeý sharalary bastaldy. Jumystar túngi ýaqytta júrgiziledi jáne tórt negizgi kezeńnen turady:
- I kezeń: 20 sáýirden 30 mamyrǵa deiin (emenderdi tórt ret, terekterdi eki ret óńdeý);
- II kezeń: 1 maýsymnan 30 maýsymǵa deiin;
- III kezeń: 5 shildeden 5 tamyzǵa deiin;
- IV kezeń: 15 tamyzdan 20 qyrkúiekke deiin.
Óńdeý úshin sertifikattalǵan biologiialyq jáne kei jaǵdaida tómen qaýip klasyndaǵy (P-4) himiialyq preparattar qoldanylady. Olar el aýmaǵynda qoldanýǵa ruqsat etilgen jáne klimattyq faktorlar eskerilgen, adamdar, qustar men janýarlar úshin ziiansyz.
Sońǵy tórt jyldaǵy jumystardyń nátijeleri boiynsha bul preparattar, ásirese, kashtan japyraǵy kóbelegi, dolana jáne raýshan japyraq shiratqyshy siiaqty fitofag ziiankesterge qarsy kúreste joǵary tiimdilik kórsetken. Jyl saiynǵy júieli óńdeý ziiandy jándikterdiń sanyn turaqty túrde azaityp, qaladaǵy aǵashtardyń jai-kúiin saqtap turýǵa múmkindik beredi.
