2025 jyly Almatyda 40 846 sábi dúniege kelgen. Onyń shamamen 300-i - egiz, al úsh otbasynda úshemder týǵan. Bul týraly "Azamattarǵa arnalǵan úkimet" memlekettik korporatsiiasynyń qalalyq filialy málimdedi, dep habarlaidy Dalanews.kz.
Byltyr egizderdiń eń kóp týýy Alataý aýdanynda tirkelgen. Munda 62 egiz ómirge kelgen. Odan keiin Túrksib aýdanynda 45 egiz jáne bir úshem, sondai-aq Naýryzbai aýdanynda 42 egiz jáne bir úshem dúniege kelgen.
Sondai-aq:
- Medeý aýdanynda - 36 egiz jáne bir úshem,
- Bostandyq aýdanynda - 33 egiz,
- Áýezov aýdanynda - 30 egiz,
- Almaly aýdanynda - 27 egiz,
- Jetisý aýdanynda - 23 egiz tirkelgen.
Qazirgi tańda balanyń týýyn tirkeý proaktivti formatta júzege asyrylady: sábi dúniege kelgennen keiin bir táýlik ishinde anasynyń uialy telefonyna 1414 qysqa nómirinen derekterdi rásimdeýge arnalǵan SMS habarlama jiberiledi. Sondai-aq bul qyzmetti ekinshi deńgeili bankterdiń mobildi qosymshalary, eGov portaly jáne halyqqa qyzmet kórsetý ortalyqtary arqyly alýǵa bolady.
Memleket tarapynan bala týýyna bailanysty birjolǵy járdemaqy qarastyrylǵan. Birinshi, ekinshi jáne úshinshi balaǵa 38 ailyq eseptik kórsetkish (AEK), tórtinshi jáne odan keiingi balalarǵa 63 AEK tólenedi. Egiz, úshem nemese tórtem dúniege kelgen jaǵdaida, járdemaqy ár balaǵa jeke-jeke beriledi.
Vedomstvo dereginshe, Almaty qalasy sońǵy jyldary egizder sany kóp tirkeletin óńirlerdiń qatarynan turaqty túrde oryn alyp keledi.
