Túrkistan oblysynyń bas sanitarlyq dárigeri Nurymbet Nyshanov aimaqtaǵy koronavirýstan qaitys bolǵan alǵashqy naýqas týraly egjei-tegjeili aityp berdi, dep habarlaidy Dalanews.kz.
"Er adam Almaty oblysynyń Qarasai aýdanynda bir ai qonaqta bolǵan, onysyn jasyryp, aitpaǵan. Ol 15 naýryzda avtobýsqa otyryp, týǵan jerine oralǵan, al 26 naýryzda ol ózin nashar sezinip, aýrýhanaǵa tústi. Ol Jetisai aýdandyq aýrýhanasynyń terapiialyq bóliminde em aldy", - dedi Nyshanov.
Sonymen birge, oblystyń bas dárigeri emdeý nátije bermegenin jáne naýqastyń jaǵdaiy nasharlai túskenin aitty.
Osydan keiin, 29 naýryzda naýqasta pnevmoniia órship, entigip, tynys alýy aýyrlap, juqpaly aýrýlar bólimine aýystyryldy. Ol sonymen birge qant diabetimen aýyrǵan. Zerthanalyq zertteýlerden keiin COVID-19 rastaldy. Onymen tyǵyz bailanysta bolǵan 25, odan bólek taǵy 40 adam anyqtaldy, - dedi ol.
Buryn habarlanǵandai, biyl 4 sáýirde Túrkistan oblysynda koronavirýs infektsiiasynan kisi ólimi deregi tirkeldi. Er adamnyń 1956 jylǵy, Jetisai aýdanynyń turǵyny ekeni belgili. Qazirgi ýaqytta elimizde koronavirýs juqtyrýdyń 500 jaǵdaiy rastaldy. Qazaqstanda COVID-19-dan 4 adam qaitys boldy.
