تۇركىستان وبلىسىنىڭ باس سانيتارلىق دارىگەرى نۇرىمبەت نىشانوۆ ايماقتاعى كوروناۆيرۋستان قايتىس بولعان العاشقى ناۋقاس تۋرالى ەگجەي-تەگجەيلى ايتىپ بەردى، دەپ حابارلايدى Dalanews.kz.
"ەر ادام الماتى وبلىسىنىڭ قاراساي اۋدانىندا ءبىر اي قوناقتا بولعان، ونىسىن جاسىرىپ، ايتپاعان. ول 15 ناۋرىزدا اۆتوبۋسقا وتىرىپ، تۋعان جەرىنە ورالعان، ال 26 ناۋرىزدا ول ءوزىن ناشار سەزىنىپ، اۋرۋحاناعا ءتۇستى. ول جەتىساي اۋداندىق اۋرۋحاناسىنىڭ تەراپيالىق بولىمىندە ەم الدى"، - دەدى نىشانوۆ.
سونىمەن بىرگە، وبلىستىڭ باس دارىگەرى ەمدەۋ ناتيجە بەرمەگەنىن جانە ناۋقاستىڭ جاعدايى ناشارلاي تۇسكەنىن ايتتى.
وسىدان كەيىن، 29 ناۋرىزدا ناۋقاستا پنيەۆمونيا ءورشىپ، ەنتىگىپ، تىنىس الۋى اۋىرلاپ، جۇقپالى اۋرۋلار بولىمىنە اۋىستىرىلدى. ول سونىمەن بىرگە قانت ديابەتىمەن اۋىرعان. زەرتحانالىق زەرتتەۋلەردەن كەيىن COVID-19 راستالدى. ونىمەن تىعىز بايلانىستا بولعان 25، ودان بولەك تاعى 40 ادام انىقتالدى، - دەدى ول.
بۇرىن حابارلانعانداي، بيىل 4 ساۋىردە تۇركىستان وبلىسىندا كوروناۆيرۋس ينفەكسياسىنان كىسى ءولىمى دەرەگى تىركەلدى. ەر ادامنىڭ 1956 جىلعى، جەتىساي اۋدانىنىڭ تۇرعىنى ەكەنى بەلگىلى. قازىرگى ۋاقىتتا ەلىمىزدە كوروناۆيرۋس جۇقتىرۋدىڭ 500 جاعدايى راستالدى. قازاقستاندا COVID-19-دان 4 ادام قايتىس بولدى.
