Bilim berý sapasyn qamtamasyz etý departamentiniń ókili jyl saiyn oqýshylardyń jazǵy kanikýly bastalysymen elimiz boiynsha 1-12 maýsym aralyǵynda «Balalar eńbegin paidalanýǵa qarsy 12 kún» Ulttyq aqparattyq naýqan ótetinin habarlady. Ótetin is-sharalar aiasynda bilim berý organdarynyń ókilderi, politsiia qyzmetkerleri kásipkerlerge kámeletke tolmaǵandardy eńbekke zańsyz tartý jazalanatynyn eske salatyn bolady.
– 18 jastan kishi kámeletke tolmaǵandar túnde jumys istei almaidy, olarǵa úlken fizikalyq júkteme túsiretin jumysty tapsyrýǵa bolmaidy. 16 jasqa deiin eńbek shartyna ata-analardyń biri qol qoiýy kerek. QR Eńbek kodeksine sáikes 14-16 jastaǵy balalar aptasyna 24 saǵattan, al 16-18 jastaǵy jasóspirimder 36 saǵattan artyq jumys istemeýleri tiis, – dedi Gúldana Omarova.
Sózin jalǵastyrǵan departament ókili daǵdarys oqiǵasy týyndai qalsa, balalar men jasóspirimder, sondai-aq olardyń otbasylary departamenttiń 225-18-80 nómirli «jedel jelisine» qońyraý shala alatynyn eskertti.
– Eger siz balalardyń densaýlyǵyna, qaýipsizdigine ziian keltirýi múmkin jumystarǵa tartylǵanyn bilseńiz, oǵan nemketti qaramai, tiisti quzyrly organdarǵa birden habarlaǵanyńyz jón. Óitkeni, bala densaýlyǵy onyń quqyǵyn qorǵaý – bárimizdiń ortaq isimiz, – dedi G. Omarova.
Budan ózge, Gúldana Omarova 2019 jyly Telegramm messendjerinde «Bala Qorgay» chaty qurylǵanyn habarlady. Ol kámeletke tolmaǵandarǵa qatysty quqyq buzýshylyq nemese qatygezdik faktilerin tirkeýge arnalǵan. Kanaldy ashý bastamasy Qazaqstannyń Bilim jáne ǵylym ministrliginiń Balalardyń quqyqtaryn qorǵaý komitetine tiesili. Oǵan qosylý úshin qosymshada bala_qorgau dep terý kerek.
– Ótken aptada «Bala Qorgay» chatyna 63 suraq tústi. Shuǵyl áreket etý sharalary qabyldandy. Mysaly, ata-analarmen túsindirý jumystary júrgizildi, ómirlik qiyn jaǵdaiǵa tap bolǵan balaǵa kómek kórsetildi, – dedi G. Omarova.
Bul rette kelip túsken máselelerdiń negizgi bóligi quqyqtyq aqparattandyrýǵa qatysty. Keri bailanys táýlik boiy, demalyssyz jumys isteidi.
