Almatyda 3 adamnyń ólimine ákep soqqan avtobýs apatyna qatysty sot otyrysy ótti. Sot úkimimen avtobýs júrgizýshisin urǵan er adam 8 jylǵa sottaldy, - dep habarlaidy Dalanews.kz.
"Kúdikti Darhan Ahmedjanov QR Qylmystyq kodeksiniń 293-baby 1-bóligimen, 351-baby 3-bóligimen kináli dep tanylsyn. Oǵan QR Qylmystyq kodeksiniń 293-baby 1-bóligimen 1 jyl merzimge bas bostandyǵynan aiyrý túrindegi jaza taǵaiyndalsyn. QR Qylmystyq kodeksiniń 351-baby 3-bóligimen 8 jylǵa bas bostandyǵynan aiyrý túrindegi jaza taǵaiyndalsyn.
QR Qylmystyq kodeksiniń 58-baby 2-bóligine sáikes Darhan Ahmedjanovqa túpkilikti 8 jyl bas bostandyǵynan aiyrý túrindegi jaza taǵaiyndalsyn. Jazany óteý qylmystyq atqarý júiesiniń qaýipsizdigi barynsha tómen mekemesinde taǵaiyndalsyn", - dedi sýdia.
Al jábirlenýshilerdiń talap-aryzdary ishinara qanaǵattandyryldy. Jábirlenýshi Qusaiynovanyń paidasyna 6 million 397 myń teńge materialdyq shyǵyn, 5 million teńge moraldyq shyǵyn, jábirlenýshi Baidýálievtiń paidasyna 10 million teńge moraldyq shyǵyn óndiriledi.
Sot júrgizýshi Ermek Shókebaevany jábirlenýshi dep tanydy. Shókebaeva men "Dýman Trans" JShS-den moraldyq ótemaqy óndirý týraly talap qanaǵattandyrylmady.
Eske salaiyq, 2023 jylǵy jeltoqsanda Almatyda avtobýs aialdamada turǵan bir top adamdy qaǵyp ketken edi. Saldarynan 3 adam mert boldy.
Keiin qoǵamdyq kólik júrgizýshisin urǵan er adam ustaldy. Bul derek negizinde QR QK-niń 345-baby 3-bóligi boiynsha sotaldy tergeý de bastaldy.
Al avtobýs júrgizýshisi keshirim surady.
"Men osy qaiǵyly jaǵdaiǵa bailanysty qaza tapqan marqumdardyń týystaryna kóńil aitamyn. Meniń tarapymnan eshqandai ádeii osylai isteiin degen niet bolǵan joq. Mundaidy jaýyma da tilemespin. Ózimdi kináli sanamaimyn. Jolaýshy esimnen tanyp qalǵansha urdy.
Aýrýhanada jatqanymda tergeýshi keldi. Bireýi er, ekinshisi áiel. Siz zardap shegýshisiz. Kináńiz joq dep aitqan. Endi jazylyp shyqqanda aýyr bap boiynsha aiyptap jatqanyn bildim. Ózim arendaǵa úi jaldap turamyn. Eki balam bar. Solar úshin eńbek etip kelemin. Meniń jumysyma eshkim shaǵymdanbaǵan. Maǵan osyndai qylmystyq kodeks boiynsha ne úshin aýyr aiyp taǵyp jatqanyn túsinbeimin. Eger soqqy almaǵanymda, mundai jol apatyna jol bermes edim. Ádildik bolady dep úmittenemin", – deidi Ermek Shókebaeva.
Sonymen qatar, Almatydaǵy avtobýs apatynan qaza tapqandardyń jaqyndary buǵan deiin de ótemaqy talap etti.
Avtobýs apatynan qaza tapqan erli-zaiypty Talap Qosymov pen Gúljahan Jetpisbaevanyń týysy Súiinbai Ońalbekuly park ókilderiniń bir aptadan keiin ǵana kóńil aitqanyn jetkizdi. Olardyń aitýynsha, tipti sol kezde de kómek kórsetý týraly jaq ashpaǵan. Al bul otbasynyń artynda tórt balasy qalǵan. Turyp jatqan baspanalary da nesiege alynǵan eken.
"Bankten 17 million, qalǵanyn ózderi aýyldaǵy úileri men kólikterin satyp páter aldy. Sol banktegi aqshasy jabylsa, balalaryna baspana qalar edi. Endi avtobýs parki jaǵynan úmit kútip otyrmyz. Úmitimizdi aqtaityn shyǵar degen oidamyz", – dedi Súiinbai Ońalbekuly.
