Almaty qalasynda avtobýs júrgizýshisi jaiaý júrginshiler ótkelinde elektrosamokat mingen eki qyzdy qaǵyp ketti. Zardap shekkender dereý aýrýhanaǵa jetkizildi. Qazir oqiǵanyń mán-jaiyn politsiia anyqtap jatyr, dep habarlaidy Dalanews.kz.
Qalalyq politsiia departamentiniń málimetinshe, jol-kólik oqiǵasy 3 qyrkúiek, sársenbi kúni saǵat 12:30 shamasynda Almaly aýdanynda bolǵan.
"Foton markaly avtobýs júrgizýshisi Maqataev kóshesimen shyǵys baǵytta kele jatyp, Ýálihanov kóshesimen soltústikke qarai elektrosamokatta kele jatqan eki qyzdy jaiaý júrginshiler ótkelinde qaǵyp ketken", – dedi vedomstvonyń baspasóz qyzmeti.
2008 jyly týǵan qyzdar túrli jaraqat alyp, meditsinalyq mekemege jetkizildi. Qazir aýdandyq politsiia basqarmasynyń qyzmetkerleri jol apatynyń barlyq sebebin anyqtap jatyr.
